Афіцэр францускай паліцыі і яго жонка загінулі ў выніку нападу, які адбыўся позна ўвечары 13 чэрвеня ў мястэчку Магнавіль, разьмешчаным ў паўсотні кілямэтраў ад Парыжа.
Падчас спэцапэрацыі паліцыі нападнік, узброены нажом, таксама быў забіты. Трохгадовага хлопчыка, які таксама быў пад пагрозай, удалося выратаваць.
Матывы нападніка і яго асобу паліцыі не ўдалося неадкладна высьветліць.
Блізкае да групоўкі «Ісламская дзяржава» інфармацыйнае агенцтва ўказала, што гэтая групоўка бярэ адказнасьць за напад.
Францыя, як і іншыя краіны Эўропы, перажывае хвалю гвалту, часта накіраваную супраць супрацоўнікаў паліцыі або вайскоўцаў.
