Такую заяву зрабілі намесьнік старшыні партыі БНФ Рыгор Кастусёў і сябра гэтай партыі Алесь Міхалевіч. Партыйцы напісалі ліст Валянціне Мацьвіенцы, у якім выклалі сваю пазыцыю адносна ейнай прапановы, агучанай падчас форуму рэгіёнаў Беларусі і Расеі.
Зварот да расейскай функцыянэркі Кастусёў і Міхалевіч падпісалі як былыя кандыдаты ў прэзыдэнты на выбарах 2010 году і прадстаўнікі Партыі БНФ.
«Такога роду прапановы вядуць да поўнай страты незалежнасьці Беларусі. Усе інтэграцыйныя саюзы і аб’яднаньні, створаныя з ініцыятывы Расейскай Фэдэрацыі на постсавецкай прасторы, ужо прывялі да частковай страты незалежнасьці і сувэрэнітэту Беларусі і зьніжэньня ўзроўню жыцьця яе насельніцтва», — лічыць Рыгор Кастусёў.
«Афіцыйных камэнтароў у сувязі з выказваньнем Мацьвіенкі ад прадстаўнікоў беларускай улады няма, і гэта зразумела: яны не наважацца пярэчыць расейскаму боку, бо залежаць ад яго фінансава. У іх на тое ня хопіць мужнасьці і сьмеласьці, — кажа палітык. — Тыя інтэграцыйныя праекты з Расеяй, якія ёсьць, не ідуць на карысьць Беларусі. Няма свабоднага перамяшчэньня тавараў, паслугаў, людзкіх рэсурсаў у межах гэтак званага Эўразійскага саюзу. Беларусь цярпіць страты. Пастаянна адбываюцца з Расеяй то „малочныя войны“, то „газавыя войны“. Наша заява — гэта спроба супрацьстаяць шкодным для Беларусі памкненьням з боку Расеі».
Кастусёў і Міхалевіч прапануюць старшыні Савету Фэдэрацыі Расеі зьмяніць падыходы да «пытаньняў наладжваньня ўзаемадачыненьняў», каб дачыненьні «выбудоўваліся на ўзаемавыгадным супрацоўніцтве з карысьцю для грамадзян абедзьвюх дзяржаў».
«У адваротным выпадку, калі ў вас адсутнічаюць прапановы і ідэі, якія спрыяюць выхаду эканомік дзьвюх дзяржаў з зацяжнога крызісу і павышэньню ўзроўню жыцьця насельніцтва, мы патрабуем ад вас спыніць усялякія выказваньні і прапановы па пытаньнях расейска-беларускай інтэграцыі», — пішуць Мацьвіенцы Рыгор Кастусёў і Алесь Міхалевіч.
На думку Кастусёва, іхны з Алесем Міхалевічам ліст пакажа, што ў Беларусі ёсьць палітычныя сілы, якія разглядаюць цяперашнюю інтэграцыю з Расеяй як шкодную для Беларусі.
Старшыня Савету Фэдэрацыі Расеі Валянціна Мацьвіенка заклікала паскорыць увядзеньне агульнай візы так званай саюзнай дзяржавы Расеі і Беларусі:
«Лічу, што нельга лішне зацягваць з рашэньнем гэтай задачы. Гэтае пытаньне знаходзіцца ў стадыі абмеркаваньня. Расея ўнесла такую прапанову».
Кіраўніца верхняй палаты расейскага парлямэнту адзначыла, што, на погляд Расеі, «увядзеньне агульнай візы стане вялізным стымулам для паглыбленьня ўсебаковай інтэграцыі Расеі і Беларусі, павелічэньня зьнешняга турпатоку ў абедзьве краіны».
