Кампанія «Будгазмантаж» расейскага мільярдэра Аркадзя Ратэнберга ня можа будаваць мост праз Керчанскі праліў заплянаванымі тэмпамі і інвэставаць у закуп дарагога будаўнічага абсталяваньня, бо аплата выкананых працаў затрымліваецца, паведамляе Forbes.
Апошні раз грошы падрадчыку будаўніцтва Керчанскага моста, кампаніі Аркадзя Ратэнберга, пералічвалі ў сьнежні. Выплата ў 65,4 мільярда расейскіх рублёў, заплянаваная на гэты год, «завісла» таму, што зацягнуліся бюракратычныя працэдуры.
Як піша Forbes, аванс ужо патрачаны, а на будпляцоўцы не хапае абсталяваньня.
У студзені 2015 году «Будгазмантаж» Ратэнберга бяз конкурсу стаў падрадчыкам па будоўлі Керчанскага моста. Мост павінен будзе зьвязаць Крым і мацерыковуaю частку Расеі. Дарожны рух на мосьце павінен адкрыцца да канца 2018 году.