У мінулагодніх выбарах прэзыдэнта Беларусі ўдзельнічалі чатыры прэтэндэнты. Сяргей Гайдукевіч, Тацяна Караткевіч і Мікалай Улаховіч прайгралі Аляксандру Лукашэнку. Свабода распытала іх, ці будуць яны балятавацца ў Палату прадстаўнікоў?
Гайдукевіч: Мы за незалежнасьць і сувэрэнітэт
Старшыня Лібэральна-дэмакратычнай партыі Сяргей Гайдукевіч на пытаньне, ці будзе ён удзельнічаць у выбарчай кампаніі, адказаў так:
«Канечне. Я ж — лідэр партыі. Было б дзіўна, калі б я адмовіўся ад парлямэнцкіх выбараў. Мы закрыем усе 110 акругаў. Партыя прапануе кожнаму кандыдату базавую праграму. Яе працоўная назва — „За моцную Беларусь!“. Што мы разумеем пад словам „моцная“? Найперш — незалежнасьць і сувэрэнітэт. Максымум увагі да нацыянальнай ідэі. Будзем прапагандаваць тэзу: „Трэба добра ведаць беларускую мову“. А прэтэндэнты дададуць да гэтага агульнага нешта сваё, што тычыцца канкрэтнай акругі».
Караткевіч: У праграме «Гавары праўду» — тры кіты
Лідэр грамадзянскай кампаніі «Гавары праўду» Тацяна Караткевіч кажа, што абавязкова будзе ўдзельнічаць у выбарчай кампаніі:
«Я лічу, што трэба дамагацца, каб голас людзей, якія хочуць пераменаў, лепшага жыцьця для сваіх сем’яў, лепшай будучыні, быў пачуты на розных узроўнях. Таму мы за ўдзел ва ўсіх выбарах — прэзыдэнцкіх, парлямэнцкіх, мясцовых».
Спадарыня Караткевіч кажа, што сама пакуль ня вызначылася, у якой акрузе будзе балятавацца:
«Закон дазваляе падаваць дакумэнты ў некалькі акругаў, а пасьля выбраць адну. Гэтым я і скарыстаюся. Але сёньня магу пэўна сказаць: гэта будзе акруга ў Менску».
Выбарчая праграма кандыдатаў ад «Гавары праўду» будзе трымацца на трох кітах, кажа Тацяна Караткевіч:
«Першы — болей эканамічных свабодаў. Другі — рэформа дзяржаўнага кіраваньня. Трэці — моцная сацыяльная абарона».
«Гавары праўду» мяркуе выставіць на выбары ў Палату прадстаўнікоў прыкладна 30 кандыдатаў.
Улаховіч: Мы за савецкія каштоўнасьці
Старшыня Беларускай патрыятычнай партыі Мікалай Улаховіч на пытаньне, ці зьбіраецца ён удзельнічаць у выбарах, заявіў:
«Напішыце, калі ласка, дакладна — разам з партыяй. Мы плянуем балятавацца прыкладна ў палове выбарчых акругаў. А вось у якіх канкрэтна і хто там будзе кандыдатам, вырашым на партыйным зьезьдзе, які правядзем напрыканцы чэрвеня. Падбярэм такіх, якія, калі нават іх не абяруць дэпутатамі, ня зганьбяць гонару і годнасьці нашай партыі.
Мы ня будзем мяняць назву партыі, але можна сьмела казаць, што яна паводле азначэньня будзе кансэрватыўнай. Нават прапішам гэта ў праграме. Мы па натуры бюракраты і ня лічым, што Беларусі неабходныя рэформы.
Нашы кандыдаты — гэта кіраўнікі даволі буйных прадпрыемстваў, прадстаўнікі інтэлігенцыі. Але галоўнае — гэта людзі, якім дарагая савецкая мінуўшчына.
Аднак мы не зьбіраемся аднаўляць Савецкі Саюз. І гэта вельмі важна. Мы патрыёты Беларусі. Мы за тое, каб яна была незалежнай і ні ў якім выпадку не прырастала расейскай губэрняй. Нам гэта абсалютна гідка».
Выбары ў Палату прадстаўнікоў прызначаныя на 11 верасьня 2016 году.
