Лінкі ўнівэрсальнага доступу

У гонар Надзеі Саўчанкі назвалі гару ў Гімалаях


Пра гэта ў эфіры «Громадського радіо» паведаміў спартыўны журналіст Валянцін Шчэрбач.

«Я вырашыў назваць адну з гор у гонар Надзеі Саўчанкі, таму што гэта жанчына, якая два гады ў засьценках адна змагалася з сыстэмай крывавага дыктатара. Летась я назваў гару ў гонар герояў Украіны, а цяпер нэпальскія ўлады выдалі афіцыйны сэртыфікат аб тым, што іншая вяршыня называецца „Надзея“», - распавёў Шчэрбач радыёжурналістам.

Інфармацыю пра гэта зьмяшчае ўкраінскае інфармацыйнае агенцтва УНІАН.

«Гімалаі — вельмі вялікая і маладая горная сыстэма. Там вельмі шмат безыменных вяршыняў. Дваццаць зь лішнім гадоў я ўгаворваў ўладу Нэпалу даць магчымасьць назваць адну зь вяршыняў украінскім імем», — адзначыў Шчэрбач. Ён распавёў, што атрымаў дазвол назваць дзьве вяршыні, бо ўжо лічыцца ў Нэпале сваім.

«Гадоў пяць я ўсё гэта выдатна дакладна ведаю, што ў іх не было назваў. Там яшчэ каля 300 такіх вяршыняў. Я абраў вельмі прыгожыя вяршыні. Там хвалюючая панарама, хочацца зваліцца на калені і маліцца за тое, што ў сьвеце ёсьць такая прыгажосьць», — сказаў Шчэрбач.

Ён таксама адзначыў, што ў Гімалаях ім было праведзена 27 футбольных матчаў пад украінскім сьцягам на вышынях ад 5,5 да 6,5 тыс. мэтраў, чатыры малыя алімпіяды і чатыры міжнародныя турніры.

Напярэдадні Надзея Саўчанка выступіла перад Вярхоўнай Радай, дэпутатам якой яна была абраная ў кастрычніку 2014 году, знаходзячыся ў маскоўскім СІЗА. Лётчыца заявіла, што ёй не складана працаваць у парлямэнце, і назвала дэпутатаў «гультаямі-школьнікамі».

У сакавіку сёлета расейскі суд прысудзіў Саўчанцы 22 гады пазбаўленьня волі паводле абвінавачаньня ў забойстве журналістаў ВГТРК Ігара Карнелюка і Антона Валошына. 25 траўня прэзыдэнт Расеі Ўладзімір Пуцін памілаваў Саўчанку пасьля звароту да яго сваякоў загінулых. Усьлед за гэтым украінскую лётчыцу абмянялі на двух асуджаных ва Ўкраіне расейскіх вайскоўцаў.

XS
SM
MD
LG