Лінкі ўнівэрсальнага доступу

Трамп забясьпечыў сабе вылучэньне кандыдатам у прэзыдэнты ЗША


Яго гатовыя падтрымаць больш за палову дэлегатаў партыйнага зьезду.

Мільярдэр Дональд Трамп заручыўся падтрымкай дастатковай колькасьці дэлегатаў маючага адбыцца зьезду Рэспубліканскай партыі ЗША для вылучэньня яго кандыдатуры ў прэзыдэнты Злучаных Штатаў. Пра гэта паведаміла ў чацьвер агенцтва Associated Press пасьля таго, як група дэлегатаў партыйнага зьезду, якія раней афіцыйна не падтрымлівалі ніводнага з кандыдатаў, заявіла аб намеры падтрымаць Трампа.

Такім чынам, лік дэлегатаў, чыёй падтрымкай удалося заручыцца Трампу, перавысіла 1237 — неабходную лічбу для вылучэньня на партыйным зьезьдзе.

Тое, што Трамп, хутчэй за ўсё, стане кандыдатам ад рэспубліканцаў, стала практычна бясспрэчным ў пачатку траўня, калі яго канкурэнты выйшлі з барацьбы за намінацыю пасьля сэрыі перамог мільярдэра на першасных выбарах.

Паводле апошніх апытаньняў, папулярнасьць Дональда Трампа сярод выбаршчыкаў расьце, і яго рэйтынг практычна зраўняўся з рэйтынгам яго меркаванага суперніка — дэмакраткі Хілары Клінтан.

Зьезд Рэспубліканскай партыі пройдзе ў Кліўлэндзе ў канцы ліпеня. Выбары прэзыдэнта ЗША адбудуцца 8 лістапада.

Паказаць камэнтары

XS
SM
MD
LG