Лінкі ўнівэрсальнага доступу

Прэзыдэнт Турэччыны абвясьціў, што зьдзелка па уцекачах будзе заблякаваная, пакуль Эўразьвяз не забясьпечыць прагрэс у візавай лібэралізацыі для турэцкіх грамадзян.

Прэзыдэнт Турэччыны Рэджэп Таіп Эрдаган паставіў пад пагрозу выкананьне зьдзелкі з ЭЗ па ўцекачах у абмен на скасаваньне віз.

Выступаючы на саміце ААН па гуманітарных пытаньнях у Стамбуле ў аўторак, 24 траўня, ён заявіў: «Калі візавай лібэралізацыі ня будзе, то парлямэнт Турэцкай Рэспублікі ня прыме ніякага рашэньня і ніякага закону ў рамках пагадненьня аб рэадмісіі». Эрдаган дадаў, што турэцкія міністры «працягнуць перамовы з эўрапейцамі». «Калі гэта прывядзе да нейкага выніку, выдатна. Калі не, мне шкада», — адзначыў кіраўнік турэцкай дзяржавы. Акрамя таго, Эрдаган падкрэсьліў, што Анкара пакуль не атрымала фінансавай дапамогі Эўразьвязу, абяцанай ў рамках пагадненьня.

Паводле падпісанага 18 сакавіка пагадненьня, усе ўцекачы, якія нелегальна прыбылі марскім шляхам да берагоў Грэцыі, павінны быць адпраўлены назад у Турэччыну. Пры гэтым за кожнага мігранта, які вярнуўся з Грэцыі ў Турэччыну, краіны ЭЗ прымуць па адным сырыйскім уцекачы з турэцкай тэрыторыі. Акрамя таго, Брусэль пагадзіўся даць Анкары 6 млрд эўра — гэтая сума павінны пайсьці на патрэбы ўцекачоў.

Складовай часткай дамовы паміж Эўразьвязам і Анкарой быў бязьвізавы рэжым з Турэччынай да ліпеня 2016 году. Для гэтага турэцкія ўлады павінны былі выканаць 72 умовы, пастаўленых перад імі Эўракамісіяй. У траўні эўрапейскія палітыкі неаднаразова заяўлялі, што гэтыя патрабаваньні ня выкананыя і, такім чынам, адмена візаў пакуль немагчымая.

Пра гэта інфармуе «Нямецкая хваля».

XS
SM
MD
LG