У сацыяльных сетках у апошнія дні распаўсюджваецца відэазапіс, на якой вучаніца 4-й клясы школы № 64 у Кувінскім раёне Фэрганскай вобласьці Махсума Абдулахадава зачытвае свой верш, напісаны ў гонар Юртбашы (кіраўнік дзяржавы).
Як стала вядома радыё «Свабода», першапачаткова відэазапіс быў выкладзены ў Instagram знакамітым сьпеваком Тахірам Усманавым.
Верш Махсумы Абдулахадавай прагучаў на адным зь мерапрыемстваў у рамках моладзевага фэсту «Мы — дзеці вялікай краіны», праведзенага ў Фэрганскай вобласьці. Фэст быў арганізаваны па ініцыятыве міністэрства культуры і спорту Узбэкістану.
У пачатку свайго верша маленькая Махсума запрашае Юртбашы (Іслама Карымава) у госьці ў свой кішлак.
Маленькая дзяўчынка таксама кажа, што зайздросьціць сівізьне на галаве Карымава і гатова аддаць яму наўзамен кожны валасок на сваёй галаве.
«Я схіляюся перад вашай сівізной: я хачу памяняць свае чорныя валасы на вашыя. З-за дум пра нас святло пачало цьмянець у вашых вачах. Я мару аддаць вам наўзамен свае чорныя вочы».
У сваёй одзе Махсума абяцае, што калі вырасьце, абавязкова напіша ў гонар Карымава паэму.
Ва Ўзбэкістане падчас ўсіх афіцыйных мерапрыемстваў прэзыдэнта Іслама Карымава завуць няйначай, як «Наш шаноўны прэзыдэнт», «Наш шаноўны Юртбашы», або «Архітэктар нашай Незалежнасьці».
Усхваленьне кіраўнікоў дзяржаў шырока распаўсюджана ў краінах Цэнтральнай Азіі.
У Таджыкістане прэзыдэнта Эмамалі Рахмона называюць «Пешвоі мілат», гэта значыць «Лідэр нацыі».
У Туркмэністане Гурбангулы Бердымухамедаў носіць тытул «Аркадаг» («Заступнік»).
У Казахстане Нурсултана Назарбаева завуць «Елбасы» (лідэр нацыі ці кіраўнік дзяржавы).
У Беларусі Аляксандар Лукашэнка сам сябе назваў некалі «Бацькам», пасьля чаго гэтая мянушка замацавалася за ім.
