Дыпляматы з Расеі, ЗША, Эўропы і Блізкага Ўсходу 17 траўня ў Вене паспрабуюць выратаваць сырыйскія мірныя перамовы. Дзяржсакратар ЗША Джон Керы і міністар замежных спраў Расеі Сяргей Лаўроў, якія будуць сустаршынямі нарады, сустрэліся 16 траўня, каб вызначыць парадак дня.
Пагадненьне аб спыненьні агню ў Сырыі дзейнічала зь лютага, але з тых часоў жорсткія баі некалькі разоў зноў успыхвалі. Яшчэ больш аддаленай выглядае пэрспэктыва «палітычнага ўрэгуляваньня» шляхам стварэньня пераходнага ўраду і правядзеньня выбараў.
Керы па-ранейшаму настойвае, што прэзыдэнт Сырыі Башар Асад павінен сысьці ў адстаўку. Ён назваў 1 жніўня гранічным тэрмінам для ўзгадненьня ўмоваў палітычнага пераходнага пэрыяду.
На баку сырыйскага дыктатара выступаюць Расея і Іран, і Башар Асад не дэманструе ніякага жаданьня сыходзіць у адстаўку.
