Лінкі ўнівэрсальнага доступу

Аўстралійскія навукоўцы правялі аналіз дадзеных за 30 гадоў і пераканаліся, што выкарыстаньне мабільных тэлефонаў не падвышае рызыку захворваньня на рак мозгу.

Вынікі дасьледаваньня апублікаваныя ў часопісе Cancer Epidemiology.

Мабільныя тэлефоны зьявіліся ў Аўстраліі ў 1987 годзе, і да 2014 годзе імі карысталіся 94 працэнты насельніцтва. Супрацоўнікі Сыднэйскага ўнівэрсытэту вывучылі дадзеныя па ўзроўні карыстаньня мабільнай сувязьзю і па захворваньні на рак мозгу (усімі яго формамі) з нацыянальнага рэгістру з 1982 да 2012 году.

Усяго за гэты пэрыяд было зафіксавана 19 858 выпадкаў злаякасных новаўтварэньняў мозгу ў мужчын і 14 222 — у жанчын. Навукоўцы змадэлявалі захворваньне па ўзроставых групах (20-39, 40-59, 60-69 і 70-84 гады) з улікам меркаваных дадзеных пра ўзровень адноснай рызыкі раку мозгу ў 1,5 у карыстальнікаў мабільных тэлефонаў і 2,5 у «заўзятых» карыстальнікаў (каля 19 працэнтаў ад агульнай колькасьці).

Высьветлілася, што ўзровень захворваньня на рак мозгу застаўся стабільным на працягу 30 гадоў, ахопленых дасьледаваньнем. Значны рост колькасьці выпадкаў назіраўся толькі сярод людзей старэйшых за 70 гадоў, аднак ён пачаўся ў 1982 годзе, калі мабільных тэлефонаў у шырокім выкарыстаньні яшчэ не было. На думку дасьледчыкаў, такі рост зьвязаны з удасканаленьнем мэтадаў дыягностыкі, у прыватнасьці укараненьнем КТ і МРТ, і павышэньнем выяўляльнасьці раку.

Атрыманыя дадзеныя адпавядаюць вынікам папярэдніх эпідэміялягічных дасьледаваньняў, якія ня выявілі прычыннай сувязі паміж выкарыстаньнем мабільнай сувязі і захворваньнем на рак мозгу.

XS
SM
MD
LG