Згодна з указам Лукашэнкі № 160 ад 3 траўня, апублікаваным (PDF) на pravo.by, кіраўнік адміністрацыі Кітайска-беларускага індустрыяльнага парку «Вялікі камень» Андрэй Галь звольнены за «аднаразовае грубае парушэньне працоўных абавязкаў» (пункт 1 арт. 47 Працоўнага кодэксу Беларусі).
У чым было парушэньне, афіцыйна не паведамляецца, як і не паведамляецца, якая адказнасьць можа чакаць Галя.
У адміністрацыі Парку карэспандэнту Свабоды патлумачылі, што самі маюць толькі афіцыйную інфармацыю і даваць камэнтары ня могуць. Хто зойме месца Галя, пакуль невядома.
Галь быў прызначаны Лукашэнкам кіраўніком Парку ў сьнежні 2014 года. Да таго Галь быў намесьнікам старшыні Менгарвыканкаму, займаўся пераважна пытаньнямі будаўніцтва.
Будаўніцтва Парку пад Смалявічамі вядзецца па графіку, але інвэстыцыі прыцягваюцца неактыўна. Так, у лютым сайт «Заўтра тваёй краіны» зьвяртаў увагу на тое, што ў парку паўгода не рэгістраваліся новыя рэзыдэнты, пішучы, што адсутнасьць цікаўнасьці кітайскіх інвэстараў выглядае «дысанансам на фоне іх супэрактыўнасьці ў іншых краінах і рэгіёнах». Лукашэнка пры гэтым заяўляў, што чакае «самых сур’ёзных інвэстыцыяў».
