Пасьля цьверджаньняў Беларусі, што МАГАТЭ нібыта ўхваліла праект Астравецкай АЭС, міністэрства замежных справаў Літвы зварачае ўвагу, што дырэктар МАГАТЭ Юкія Амана ў красавіку наведаў Беларусь не з экспэртнай місіяй, якая дала б сваю ацэнку станцыі.
«Пасьля візыту ў Беларусь генэральны дырэктар МАГАТЭ ня даў ніякіх ацэнак разьвіцьцю праекту Астравецкай АЭС, а проста канстатаваў факт, што Беларусь — яшчэ адна краіна, якая пачынае разьвіваць праграму ядзернай энэргетыкі. Прызнаючы, што праект Астравецкай АЭС ажыцьцяўляецца надзвычай сьпешна, Ю. Амана таксама зазначыў, што Беларусь мусіць дзейнічаць празрыста і адкрыта», — цытуе заяву літоўскага замежнапалітычнага ведамства партал delfi.lt.
Паводле заявы МЗС, Літва заклікае Беларусь цясьней супрацоўнічаць з МАГАТЭ і выконваць патрабаваньні агенцтва. Літва таксама заклікае Беларусь неадкладна правесьці тэст Астравецкай АЭС на прадмет рызыкі і бясьпекі.
Апрача гэтага, Літва заклікае Беларусь пагадзіцца на прапанову Камітэту ажыцьцяўленьня канвэнцыі Эспа і стварыць міжнародную экспэртную камісію для разгляду справы. Камітэт ажыцьцяўленьня канвэнцыі Эспа абвясьціў у 2013 годзе, што праект Астравецкай АЭС не адпавядае патрабаваньням канвэнцыі, а сёлета ў сакавіку запрапанаваў стварыць міжнародную экспэртную камісію для вырашэньня спрэчных момантаў. Менск адмовіўся прыняць экспэртаў і адхіляе крытыку Літвы, цьвердзячы, што забясьпечыць на станцыі найвышэйшыя стандарты бясьпекі.
Астравецкую АЭС будуе расейская карпарацыя ядзернай энэргетыкі «Росатом».
