Лінкі ўнівэрсальнага доступу

logo-print

ААН: баі на ўсходзе Ўкраіны — самыя інтэнсіўныя з 2014 году


Сытуацыя ў зоне баявых дзеяньняў на ўсходзе Ўкраіны 28 красавіка 2016 году (згодна з афіцыйнымі украінскімі крыніцамі)

Сытуацыя ў зоне баявых дзеяньняў на ўсходзе Ўкраіны 28 красавіка 2016 году (згодна з афіцыйнымі украінскімі крыніцамі)

Назіральнікі ААН папярэджваюць аб тым, што сытуацыя на паўднёвым усходзе Ўкраіны рэзка пагоршылася, і заклікаюць абодва бакі выконваць перамір’е.

У ходзе ўзброенага канфлікту на ўсходзе Ўкраіны, які пачаўся ў красавіку 2014 году, загінулі 9333 чалавекі і 21396 былі параненыя.

Гэтыя лічбы прывёў на пасяджэньні Рады Бясьпекі ААН, якое адбылося ў чацьвер і было прысьвечана сытуацыі ва Ўкраіне, памочнік генэральнага сакратара арганізацыі па палітычных пытаньнях пасланьнік Этыёпіі Тае-Брук Зэрыхун.

Апошні сьмяротны інцыдэнт адбыўся 27-га красавіка: падчас артылерыйскага абстрэлу ў паселішчы Аленаўка Данецкай вобласьці былі забітыя чатыры мірныя жыхары, восем атрымалі раненьні.

Па словах Зэрыхуна, эскаляцыя канфлікту ў апошнія тыдні дасягнула свайго ранейшага піку, які прыйшоўся на жнівень 2014 году. Абодвум бакам варта ўстрымлівацца ад баявых дзеяньняў, падкрэсьліў ён.

Зэрыхун таксама абвінаваціў абодва бакі ў стварэньні перашкодаў працы міжнароднай маніторынгавай групы, заснаванай у адпаведнасьці зь менскімі дамоўленасьцямі, але дадаў, што гэта часьцей адбываецца ў раёнах, якія кантралююцца сэпаратыстамі.

Гэта было першае са сьнежня 2015 году пасяджэньне Рады Бясьпекі, прысьвечанае становішчу ва Ўкраіне. Злучаныя Штаты, Францыя і Вялікабрытанія асудзілі агрэсіўныя, па іх словах, крокі Расеі, якія справакавалі канфлікт. «Усё, што адбываецца сёньня, — заявіла сталы прадстаўнік ЗША ў ААН Саманта Паўэр, — стала вынікам парушэньня Расеяй сувэрэнітэту і тэрытарыяльнай цэласнасьці суседняй дзяржавы, якое пачалося з акупацыі Крыму і потым перарасло ў маштабную ваенную падтрымку сэпаратыстаў на ўсходзе Ўкраіны».

Прадстаўнік Расеі Віталь Чуркін у ходзе палемікі заявіў, што Ўкраіна, прыкрываючыся дыскусіямі ў Радзе Бясьпекі, выкарыстоўвае сваё войска для займаньня гарадоў, якія знаходзяцца ў «нэўтральнай паласе», усталяванай менскімі пагадненьнямі. «З самага пачатку канфлікту Рада Бясьпекі, на жаль, пераўтварылася ў прапагандысцкую плятформу», — дадаў Чуркін.

Намесьнік міністра замежных спраў Украіны Вадзім Прыстайка абвінаваціў Маскву ў агрэсіі: «Расея арганізавала і разгарнула на Данбасе гібрыдны воінскі кантынгент, які складаецца з 34 тысяч чалавек, — рэгулярных расейскіх вайскоўцаў, а таксама мясцовых і замежных байцоў. Расейскія афіцэры кіруюць гэтым незаконным кантынгентам, узброеным лепш, чым большасьць чальцоў НАТО. Пры гэтым Расея сьцьвярджае, што зброя гэта была набытая ў мясцовых прамтаварных крамах. Я ў гэтых крамах ня бачыў нават прыстойнага нажа, ня тое што сыстэмы залпавага агню або рэактыўныя агнямёты».

XS
SM
MD
LG