Лінкі ўнівэрсальнага доступу

Рух «За Свабоду» раздаў 5 тысяч улётак на Чарнобыльскі шлях


Юрась Губарэвіч раздае ўлёткі

Юрась Губарэвіч раздае ўлёткі

25 красавіка актывісты руху «За свабоду» раздавалі каля кінатэатру «Кастрычнік» і Акадэміі навук улёткі з запрашэньнем на Чарнобыльскі шлях. Тлумачылі, што менавіта тут, каля станцыі мэтро «Акадэмія навук», 26 красавіка, у 30-ю гадавіну аварыі на ЧАЭС, а 18-й гадзіне прызначаны збор. Месцы людныя — побач інтэрнаты і вучэбныя карпусы Беларускага нацыянальнага тэхнічнага ўнівэрсытэту, акадэмічныя інстытуты. Збольшага людзі ахвотна бралі ўлёткі, зь цікавасьцю чыталі. Былі і такія, якія хуценька зьбягалі, распавёў першы намесьнік старшыні руху «За свабоду» Юрась Губарэвіч.

Ва ўлётках — 6 фактаў пра наступствы аварыі на ЧАЭС: 70% радыеактыўных ападкаў выпала на тэрыторыю Беларусі; 20% лясоў забруджаныя; 6 тысяч квадратных кілямэтраў земляў больш не выкарыстоўваюцца ў сельскай гаспадарцы; 110 тысяч беларусаў былі адселеныя; 30% насельніцтва мае хваробы шчытападобнай залозы; «ёдны ўдар» атрымалі амаль усе беларусы.

І патрабаваньні:

— Мы хочам ведаць праўдзівую статыстыку пра хваробы пасьля аварыі на ЧАЭС

— Мы хочам ведаць, колькі радыяцыі ў нашай ежы

— Мы хочам, каб наша ежа вырошчвалася на чыстай тэрыторыі

— Мы ня хочам АЭС на беларускай зямлі

Намесьнік старшыні руху «За свабоду» Алесь Лагвінец паведаміў, што яны надрукавалі 5 тысяч улётак і ўсе ўжо раздалі. Акцыя прайшла безь перашкодаў і затрыманьняў.

Заяўка на правядзеньне Чарнобыльскага шляху была пададзеная 8 красавіка. Аргкамітэт прапаноўваў уладам дазволіць збор удзельнікаў акцыі на пляцоўцы каля Нацыянальнай акадэміі навук з 18.00 да 19.00. Пасьля плянавалася прайсьці маршам па вуліцах Сурганава і Арлоўскай да памятнага знаку «Ахвярам Чарнобыля», а затым правесьці мітынг і ўскладаньне кветак. Акцыю плянавалі завяршыць да 21.00.

Гарадзкія ўлады задаволілі яе амаль цалкам, за выключэньнем таго, што месца збору перанесьлі на іншы бок праспэкта Незалежнасьці, да кінатэатра «Кастрычнік», а час збору скарацілі на паўгадзіны.

Беларуская апазыцыя праводзіць «Чарнобыльскі шлях» штогод, пачынаючы з 1988 году. Выключэньнем стаў 2011 год, калі сталічныя ўлады забаранілі шэсьце і далі дазвол толькі на мітынг.

Ганаровай старшынёй аргкамітэту Чарнобыльскага шляху сёлета стала нобэлеўская ляўрэатка Сьвятлана Алексіевіч.

XS
SM
MD
LG