Лінкі ўнівэрсальнага доступу

Менскай школе прысвоена імя амэрыканкі Рут Уолер


Школе № 130 у Менску прысвоена імя грамадзянкі Злучаных Штатаў Амэрыкі Рут Уолер.

На ўрачыстай цырымоніі ў менскай школе прысутнічалі намесьніца генэральнага сакратара ААН Гэлен Кларк, міністар замежных спраў Беларусі Ўладзімер Макей і часовы павераны ў справах ЗША ў Беларусі Скот Роланд.

Фотагалерэя цалкам у вялікім памеры тут

(Зьлева направа) Скот Роланд, Гэлен Кларк і Ўладзімер Макей

(Зьлева направа) Скот Роланд, Гэлен Кларк і Ўладзімер Макей

Уладзімер Макей заявіў, што Беларусь і ЗША наладжваюць дыялёг і ня выключанае аднаўленьне ранейшага дыпляматычнага ўзроўню супрацоўніцтва, у тым ліку вяртаньне амбасадараў у Менск і Вашынгтон. Скот Роланд распавёў пра жыцьцё Рут Уолер і сказаў, што ЗША будуць працягваць яе справу, шукаць партнэраў для менскай школы ў Каліфорніі (родны штат Рут Уолер).

Падчас урачыстай цырымоніі ў менскай школе №130

Падчас урачыстай цырымоніі ў менскай школе №130

Рут Уолер была супрацоўніцай місіі Адміністрацыі дапамогі і аднаўленьня Аб’яднаных Нацый (UNRRA), якая працавала ў Беларусі ў 1946–1947 гадах. У жніўні 1946 году 24-гадовая амэрыканка ўратавала трох беларускіх хлопчыкаў, якія танулі ў возеры. Неўзабаве захварэла на запаленьне лёгкіх і мэнінгіт. Нягледзячы на намаганьні лекараў, выратаваць Рут Уолер не ўдалося. Яе пахавалі на Вайсковых могілках у Менску.

Дзейнасьць UNRRA была скіраваная на дапамогу краінам, якія найбольш пацярпелі ў Другую ўсясьветную вайну. Значны ўнёсак у дзейнасьць арганізацыі зрабілі ЗША. У Беларусі ў складзе місіі UNRRA працавалі пятнаццаць чалавек, у фінансавым вымярэньні дапамога ЗША па гэтай лініі склала 60 мільёнаў даляраў.

XS
SM
MD
LG