Прадстаўнік Міністэрства замежных спраў Нідэрляндаў 24 красавіка заявіў, што службовыя асобы знаходзяцца «ў кантакце» з Эбру Умара, якая сама паведаміла ў сацыяльных сетках пра сваё затрыманьне ў ноч на нядзелю ў яе доме ў курортным турэцкім горадзе Кушадасы.
45-гадовая журналістка Эбру Умар нядаўна напісала артыкул з крытыкай Эрдагана ў штодзённай нідэрляндзкай газэце Metro. Некаторыя ўрыўкі з артыкулу яна разьмясьціла таксама на сваёй Twitter-старонцы. Выданьне паведамляла, што пасьля публікацыі жанчыну выклікалі на допыт з нагоды паведамленьняў.
Таксама ў красавіку Эрдаган зьвярнуўся да пракурораў Нямеччыны з-за выказваньняў камэдыянта Яна Боэмэрмана, які высьмеяў турэцкага лідэра ў сатырычным вершы на нямецкім тэлебачаньні. Турэцкі ўрад назваў верш непрымальным, а нямецкія калегі адказалі, што свабода слова і мастацкага выказваньня не зьяўляецца прадметам перамоваў паміж краінамі. У той жа час пракуроры пачалі па гэтым факце расьсьледаваньне.