Афіша
Менск — Дзень адчыненых дзьвярэй у Школе маладога пісьменьніка. Музэй Пятруся Броўкі (вул. К. Маркса, 30). Пачатак а 15-ай.
Менск — лекцыя для бацькоў «Эстэтыка дзіцячага малюнка», Нацыянальны Цэнтр Сучасных Мастацтваў. Лекцыя адбываецца у рамках сэрыі мерапрыемстваў «Дзеці. Мастацтва. Творчасць», арганізатарам якіх выступаюць «Дзіцячыя творчыя майстэрні» Галерэі «Ў». На працягу красавіка і траўня бацькі і пэдагогі маюць магчымасьць атрымаць практычныя веды наконт дзіцячай творчасьці ад сапраўдных мастацтвазнаўцаў, пэдагогаў і мастакоў, якія актыўна працуюць з дзецьмі. Вул. Някрасава, 3, пачатак а 17-ай.
У гісторыі
1586 — Нясьвіж атрымаў магдэбурскае права і герб.
1794 — утварылася Найвышэйшая літоўская рада — рэвалюцыйны ўрад ВКЛ падчас паўстаньня Тадэвуша Касьцюшкі.
1917 — спэктаклямі «Паўлінка» Янкі Купалы і «У зімовы вечар» Элізы Ажэшкі ў Менску адкрылася Першае беларускае таварыства драмы і камэдыі.
1985 — Савецкі лідэр Міхаіл Гарбачоў упершыню абвясьціў пра пачатак перабудовы — праграму палітычных і эканамічных рэформаў у СССР.
2007 — утвораны беларускамоўны канал спадарожнікавага тэлебачаньня «Белсат».
У гэты дзень нарадзіліся:
1564 — Уільям Шэксьпір, ангельскі драматург і паэт. Памёр Шэксьпір таксама 23 красавіка ў 1616 годзе.
1886 — Зьмітрок Бядуля, беларускі пісьменьнік.
1891 — Сяргей Пракоф’еў, расейскі кампазытар.
1904 — Паўлюк Трус, беларускі паэт.
1934 — Уладзімер Конан, беларускі філёзаф, гісторык, літаратурны крытык.
1940 — Віктар Казько, беларускі пісьменьнік
У гэты дзень памерлі:
1616 — Мігель Сэрвантэс, гішпанскі пісьменьнік
1923 — Ігнат Канчэўскі (псэўд. Ігнат Абдзіраловіч), паэт, філёзаф, публіцыст.
1991 — Дзьмітры Касмовіч, беларускі грамадзка-палітычны дзеяч, выдавец.
2004 — Алесь Пісьмянкоў, беларускі паэт
2007 — Барыс Ельцын, прэзыдэнт Расеі.
ЦЫТАТА ДНЯ
Зьняможаны, малю ратунку ў сьмерці,
Бо ходзіць варты долі ў жабраках,
І ўсё як ёсьць нікчэмнасьць прагне сьцерці,
І вера ўся ў зьнявераных руках,
І ганьбу пакрывае пазалота,
І цноту грубасьць на таргі вядзе,
І слаўная зьняслаўлена істота,
І сілу немач сьсільвае ў бядзе,
І затыкае рот мастацтву ўлада,
І цёмны вучыць, як зьнябыць імглу,
І праўда быць прасьцячкай шчырай рада,
І гожнае добро слугуе злу.
Зьняможаны, зірнуў бы ў вочы сьмерці,
Ды як любоў самотна жыцьме ў сьвеце?
Шэкспір, 66 санэт у перакладзе Рыгора Барадуліна