Саратаўская кваліфікацыйная калегія судзьдзяў ўхваліла яе заяву аб адстаўцы.
Судзьдзя арбітражнага суду Саратаўскай вобласьці Тацяна Лескін, якая прыняла да разгляду пазоў аб адхіленьні прэзыдэнта Расеі Ўладзіміра Пуціна з пасады, пазбаўленая паўнамоцтваў рашэньнем кваліфікацыйнай калегіі судзьдзяў рэгіёну пасьля разгляду яе заявы аб адстаўцы.
«... Заява судзьдзі Арбітражнага суду Саратаўскай вобласьці Лескін Т.А. аб спыненьні яе паўнамоцтваў у адпаведнасьці з пп. 1 п. 1 арт. 14 Закону РФ» Аб статусе судзьдзяў у РФ «15 красавіка 2016 году задаволеная», — гаворыцца ў прэс-рэлізе па выніках пасяджэньня кваліфікацыйнай калегіі судзьдзяў.
У пачатку красавіка судзьдзя Лескін прыняла заяву жыхара гораду Балакава Мікалая Суворава, які патрабаваў адхіліць прэзыдэнта Расеі Ўладзіміра Пуціна ад пасады «як ворага народу, сябра алігархаў і чыноўнікаў, за разрабаваньне Расеі і зьбядненьне расейскага народу, за разбагаценьне чыноўнікаў, банкіраў, мільярдэраў-рабаўнікоў ».
Папярэдняе пасяджэньне па пазове суд прызначыў на 28 красавіка.
У рашэньні суду гаварылася, што «зацікаўленая асоба», гэта значыць прэзыдэнт Расеі Ўладзімір Пуцін, павінна «ў абавязковым парадку накіраваць у суд i асобе, якая ўдзельнiчае ў справе, водгук на заяву». Водгук зацікаўленая асоба або яго прадстаўнік павінны былі падаць у суд не пазьней, чым 25 красавіка.
Пазьней судзьдзя Лескін вынесла пастанову аб адмове ў разглядзе гэтага пазову, а дакумэнт зьнік з базы дадзеных «Электроннае правасудзьдзе».
Як паведамляла інфармацыйнае агенцтва «Вольныя навіны», пэнсіянэр з Балакава Мікалай Сувораў ўжо дзесяць гадоў піша лісты са скаргамі ў органы ўлады. У інтэрвію выданьню ён сказаў, што пасьля падачы пазову да Пуціна да яго дадому прыяжджалі супрацоўнікі паліцыі і лекары. У паліцыі інфармацыю пра візыт да пэнсіянэра не пацьвердзілі.