Пастанова Савета міністраў № 300 ад 12 красавіка, апублікаваная на прававым партале Pravo.by, вызначае меры па ўдасканаленьні аплаты працы супрацоўнікаў бюджэтных арганізацыяў.
Даплочваць бюджэтнікам будуць за кошт скарачэньня іхных калегаў. Як пішуць у пастанове, падвышальныя каэфіцыенты да акладаў бюджэтнікаў у 2016 годзе будуць выстаўляцца за кошт сродкаў, якія вызваліліся ў выніку аптымізацыі структуры і скарачэньня колькасьці бюджэтнікаў, а таксама эканоміі іншых сродкаў.
Да іх не адносіцца эканомія на камунальных паслугах. Гэтыя каэфіцыенты не фармуюць сам аклад і ня ўлічваюцца пры выстаўленьні прэміяў і даплатаў.
Канкрэтны памер такіх падвышальных каэфіцыентаў не акрэсьліваецца нават прыблізна. Эканомія бюджэтных выдаткаў вызначаецца за квартал і паўгодзьдзе органамі дзяржкіраваньня пры ўзгадненьні Мінфіну, а таксама мясцовымі выканкамамі.
У лютым 2016 году іншая пастанова вызначыла штомесячныя даплаты бюджэтнікам у памеры 3,5-4 даляры. Эканаміст Міхал Залескі казаў, што і да такіх грошай варта ставіцца без іроніі — пры зарплатах бюджэтнікаў у раёне 200 даляраў і гэта адчувальны бонус.
