Лінкі ўнівэрсальнага доступу

Ва Ўкраіне знайшлі некалькі выкрадзеных з галяндзкага музэю карцін


Пра гэта паведаміў кіраўнік МЗС Павал Клімкін. Падчас яго сёньняшняга брыфінгу былі прадстаўленыя некалькі палотнаў, якія, па словах міністра, знаходзіліся ў руках крыміналітэту.

Карціны былі скрадзеныя ў Нідэрляндах у музэі «Вэстфрыз» (горад Хорн) у студзені 2005 года, агульны кошт выкрадзеных твораў мастацтва – каля $ 10 млн.

Кіраўнік СБ Украіны Васіль Грыцак удакладніў, што ўсяго былі знойдзеныя чатыры карціны. «Адну з карцінаў мы атрымалі ў выніку апэратыўных дзеяньняў усяго за некалькі дзён да рэфэрэндуму ў Нідэрляндах, прыводзіць яго словы Інтэрфакс-Украіна. — Уяўляеце, які ў нас быў козыр, які кіраўніцтва магло разыграць? Але калі мы далажылі пра гэта прэзыдэнту (Парашэнку), было прынятае правільнае рашэньне, — каб дайсьці да канца і здабыць усе карціны. Сёньня пасьля абеду мы атрымалі яшчэ дзьве карціны», - адзначыў кіраўнік СБУ.

Ён удакладніў, што да праваахоўнікаў патрапілі карціны «Сьвецкая жанчына» (1621г.) і «Вяртаньне Іефая» (1625г), — абедзьве мастака Якава Вабена. В.Грыцак адзначыў, што экспэрты ўжо пацьвердзілі аўтэнтычнасьць адной са знойдзеных карцін. Ён дадаў, што частка выкрадзеных у галяндзкім музэі карцін знаходзяцца на не падкантрольнай Кіеву тэрыторыі Данбаса, а частка, магчыма, у Расеі.

Раней музэйшчыкі выказвалі падазрэньне, што карціны маглі быць выкрадзеныя на заказ і, паводле некаторых зьвестак, рабіліся спробы іх беспасьпяхова прадаць.

XS
SM
MD
LG