Міжнародны крымінальны трыбунал па былой Югаславіі 31 сакавіка абвесьціць прысуд па справе 61-гадовага сэрбскага ўльтранацыяналіста Ваіслава Шэшэля, які абвінавачваецца ў распальваньні этнічных чыстак падчас балканскіх войнаў 1990-х гадоў.
Сам Шэшэль ня будзе прысутнічаць на абвяшчэньні прысуду. Ён быў вызвалены ў 2014 годзе пасьля таго, як лекары паставілі яму дыягназ «рак у тэрмінальнай стадыі». З тых часоў ён стаў актыўным удзельнікам сэрбскага палітычнага жыцьця, хаця рашэньне суду гэта яму забараняла.
Гааскі трыбунал часова адпусьціў Шэшэля на лячэньне ў Сэрбію пры ўмове, што там ён ня будзе кантактаваць з ахвярамі і сьведкамі па ягонай справе, ня будзе аказваць на іх ціск і будзе абавязаны вярнуцца да трыбуналу па яго першым патрабаваньні.
Шэшэля, які быў намесьнікам прэм’ер-міністра падчас праўленьня Слабадана Мілошавіча, абвінавачваюць па трох пунктах у злачынствах супраць чалавечнасьці і па шасьці пунктах — у ваенных злачынствах за распальваньне этнічных чыстак у Харватыі, Босьніі і сэрбскай правінцыі Ваяводзіна.
Шэшэль знаходзіўся пад вартай зь 2003 году, калі ён сам здаўся Гааскаму трыбуналу. Працэс па ягонай справе пачаўся ў 2007 годзе.
Шэшэль адхіляе ўсе абвінавачаньні. У выпадку прызнаньня вінаватым яму пагражае пажыцьцёвае зьняволеньне.