Лінкі ўнівэрсальнага доступу

Пара распачынаць справу аб банкруцтве «Амкадора», — Беленькі


Кіраўніцтва машынабудаўнічага прадпрыемства «Амкадор» чарговым разам адмовілася плаціць дывідэнды сваім акцыянэрам, спаслаўшыся на складаную эканамічную сытуацыю.

24 сакавіка адбыўся чарговы штогадовы сход акцыянэраў ААТ «Амкадор».

На сходзе заслухалі даклад генэральнага дырэктара Валерыя Іванковіча, які паведаміў, што сытуацыя на прадпрыемстве жахлівая — вытворчасьць упала ў два разы.

Усяго ў «Амкадора» 2995 акцыянэраў, але на паседжаньні былі толькі 22 — абвестку пра сход далі дробным шрыфтам у газэце «Звязда». Разаслаць запрашэньні па пошце няма сродкаў. Як і некалькі папярэдніх гадоў, на паседжаньне не зьявіўся галоўны акцыянэр «Амкадора» Аляксандар Шакуцін.

Акцыянэр «Амкадора», былы супрацоўнік заводу «Ўдарнік» у складзе холдынгу Юрась Беленькі распавёў пра свае ўражаньні ад сходу акцыянэраў:

Юрась Беленькі

Юрась Беленькі

«Галоўная прычына падзеньня вытворчасьці — тое, што „Амкадор“ арыентаваны выключна на расейскі рынак, ёмістасьць якога цяпер рэзка сьціснулася — ажно ў тры разы. Цяпер Расея ня можа набываць прадукцыю „Амкадора“ ў ранейшых аб’ёмах.

Катастрофа — тое, што „Амкадор“ практычна ня мае ўласных абаротных сродкаў, і гэта прагучала ў дакладзе дырэктара.

Таксама было сказана пра запазычанасьць перад банкамі. Кошт актываў „Амкадора“ — 2 трыльёны 600 мільярдаў рублёў. А запазычанасьць перад банкамі — 1 трыльён 200 мільярдаў. Прычым крэдытор — гэта расейскі банк. Прадпрыемства ня ў стане аддаваць пазыкі, яно фактычна ў закладзе ў банку. На самой справе пара распачынаць справу аб банкруцтве».

На сходзе акцыянэры задавалі пытаньне, за якія сродкі Аляксандар Шакуцін набыў палову трактарнага заводу ў Пакістане, але адказу так і не прагучала.

Бізнэс-стратэгія „Амкадора“ скіраваная на Расею, краіну, якая знаходзіцца ў стане сыстэмнага крызісу.

«Бізнэс-стратэгія „Амкадора“ скіраваная на Расею, краіну, якая знаходзіцца ў стане сыстэмнага крызісу. Выйсьця з гэтага крызісу не відно, ёмістасьць расейскага рынку сьціскаецца. Прычыны ня толькі ў вайне, якую Расея вядзе на ўсходзе Ўкраіны — таксама ваенныя дзеяньні ў Сырыі, праблемы з Турэччынай. Таму пакідаць яе ў якасьці асноўнага пакупніка — гэта значыць рабіць вялікую памылку», — заявіў у сваім выступе перад акцыянэрамі і кіраўніцтвам «Амкадора» Юры Беленькі.

Дывідэнды акцыянэрам флягмана беларускага машынабудаваньня не выплочваюцца ўжо больш як 10 год. Тлумачаць гэта тым, што сродкі ідуць на разьвіцьцё прадпрыемства і набыцьцё новага абсталяваньня.

«Такое „разьвіцьцё“, што сёньня стан „Амкадора“ проста жахлівы. Няма нават уласных абаротных сродкаў, а прадпрыемства фактычна закладзенае банкам. І пры гэтым „Амкадор“ лічыцца лепшым машынабудаўнічым прадпрыемствам Беларусі. Дык што тады казаць пра горшыя?», — кажа Юры Беленькі.

Ён падкрэсьліў, што прадпрыемства фактычна абакрала сваіх акцыянэраў — тых, хто засноўваў прадпрыемства, укладаў у яго:

«Усяго ў „Амкадора“ больш за 1 мільён акцыяў, кошт адной складае каля 1 мільёна рублёў. Уладальнікам прывілеяваных акцыяў прадпрыемства павінна выплочваць 12% ад кошту акцыяў штогод. Такім чынам, мне, Юрыю Беленькаму, які валодае 34 акцыямі, „Амкадор“ павінен штогод выплочваць 4 мільёны рублёў. Але гэтага няма ўжо больш за дзесяць год. Паводле закону, па прывілеяваных акцыях дывідэнды выплочваюцца незалежна ад таго, ці ёсьць прыбытак у прадпрыемства. Але ў 2006 годзе статус нашых прывілеяваных акцыяў быў зьменены, яны сталі акцыямі простымі імяннымі. Гэта было незаконнае дзеяньне, фактычна махлярства. Каб выправіць яго, незаконнае рашэньне 2006 году трэба адмяніць і выплаціць усім акцыянэрам дывідэнды за ўвесь пэрыяд — з індэксацыяй».

Юры Беленькі кажа, што большасьць акцыянэраў маюць да 100 акцыяў. Але дывідэнды нікому не выплочваюцца.

Паказаць камэнтары

XS
SM
MD
LG