Католікі, пратэстанты і ўніяты ў Беларусі адзначаюць Вялікдзень — сьвята Ўваскрашэньня Хрыстовага.
На філфаку Беларускага дзяржаўнага ўнівэрсытэту (вул. К. Маркса, 31) а 10-й гадзіне пачнецца 4-ы Менскі фэстываль моваў. Пройдуць лекцыі-прэзэнтацыі больш чым 50 моваў, навукова-папулярныя лекцыі па лінгвістыцы і культуры Беларусі, а таксама моўныя гульні і размоўны клюб.
У Менскім габрэйскім абшчынным доме а 17-й гадзіне з шоў мыльных бурбалак пачнецца інтэрактыўны праект «Хваля пазытыву». На выставе будуць прадстаўленыя: жывапісныя работы, дзіцячыя малюнкі, статуэткі, карыкатуры, фота і фотакаляжы. Выстава будзе праходзіць з 27 сакавіка па 5 красавіка з 13-й да 19-й без выходных.
Ініцыятыва па перакладзе фільмаў Kinakong.by запрашае паглядзець адзін з самых тытуляваных фільмаў у гісторыі Галівуду ў беларускай агучцы. Кінапаказ адбудзецца а 17.00 у Imaguru, па вуліцы Фабрыцыюса, 4. Уваход бясплатны.
У гісторыі
1918 — Рада БНР абвясьціла, што бярэ на сябе ўсю паўнату ўлады ў Беларусі.
1986 — роўна за месяц да чарнобыльскай аварыі газэта «Літаратурная Ўкраіна» надрукавала артыкул пра нізкую якасьць будаўніцтва Чарнобыльскай АЭС. Аўтарам была маладая журналістка з Прыпяці Любоў Кавалеўская.
1999 — адбыўся І зьезд беларусаў Расейскай Фэдэрацыі.
2000 — у Менску было груба разагнанае мірнае шэсьце ў гонар Дня Волі. Улады ўвялі ў цэнтар Менску міліцыю з сабакамі, спэцназ і бронетранспарцёры; было арыштавана каля 500 чалавек, многіх зьбівалі ў пастарунках.
У памяці
Міжнародны дзень тэатру
1924 — нарадзіўся Павал Урбан, беларускі гісторык, грамадзкі дзеяч.
1963 — нарадзіўся Квенцін Таранціна, амэрыканскі рэжысёр, сцэнарыст, актор і прадусар.
1968 — загінуў Юры Гагарын, савецкі лётчык-касманаўт, першы чалавек, які зьдзейсьніў арбітальны касьмічны палёт.
1979 — памёр Рыгор Крушына, беларускі паэт.
2006 — памёр Станіслаў Лем, польскі пісьменьнік-фантаст.
Цытата
«Добрыя кнігі кажуць праўду, нават калі ў іх вядзецца пра рэчы, якіх ніколі не было і якіх ніколі ня будзе. Яны праўдзівыя па-іншаму».
Станіслаў Лем