Лінкі ўнівэрсальнага доступу

Прэм’ер-міністар Самалі заклікаў забараніць жаночае абразаньне


Самалійскія жанчыны, 2014

Самалійскія жанчыны, 2014

Небясьпечная працэдура, якую праходзяць больш за 90% жанчын у краіне, антыканстытуцыйная, але не забароненая законам.

Прэм’ер-міністар Самалі Амар Абдырашыд Алі Шэрмарк публічна падтрымаў кампанію за поўную забарону жаночага абразаньня, перадае BBC. Палітык публічна далучыўся да анлайн-пэтыцыі, якую падпісалі больш за мільён чалавек.

Працэдура супярэчыць Канстытуцыі, але парлямэнт краіны яшчэ не прыняў закон, які б забараняў яе. Як заявіла BBC актывістка кампаніі па забароне Іфра Ахмэд, ёй давялося пераконваць прэм’ера падпісаць пэтыцыю. На яе думку, гэта вялікі крок у справе, аб якой у Самалі многія ня кажуць адкрыта, і гэты крок падштурхне заканадаўцаў прыняць забарону.

Жаночае абразаньне робіцца ў некалькіх варыянтах, як вострымі прадметамі, так і праз выпальваньне ці выскрабаньне, пры любым з варыянтаў шкодзяцца вонкавыя полавыя органы дзяўчын. Звычайна дзяўчыны праходзяць працэдуру ва ўзросьце ад 4 да 11 год.

Самалі – абсалютны лідэр па долі жанчын, якія перажылі працэдуру, іх у краіне больш за 90% па ацэнках Unicef (па іншых зьвестках, 98%). Таксама працэдуру масава (больш за 80% дзяўчын) праводзяць у Гвінэі, Малі, Эгіпце, Судане, Эфіёпіі, Эрытрэі, Джыбуці, Лібэрыі, Сьера-Ліёнэ і іншых краінах Афрыкі, меней масава ў Іраку, Емэне, Савудаўскай Арабіі, Інданэзіі і іншых. Працэдура забароненая ў 23 з 27 афрыканскіх краінаў, дзе яна праводзіцца. Агулам па сьвеце жывуць больш за 200 млн жанчын, якія перажылі гэта.

Працэдура атрымала распаўсюд пераважна ў ісламскіх краінах, хоць і ня згадваецца ў Каране. Некаторыя прыхільнікі працэдуры кажуць, што так зьніжаецца сэксуальнае жаданьне жанчын, што дапамагае захаваць цнатлівасьць да шлюбу, іншыя – што калі не рабіць абразаньне, полавыя органы вырастуць да празьмерных памераў.

Абразаньне звычайна праводзіцца без абязбольваньня, часта нестэрыльнымі інструмэнтамі, у тым ліку простымі нажамі ці лязом брытвы. Працэдура часта прыводзіць да праблем са здароўем, хранічных боляў, інфэкцыяў, цяжкасьцяў пры родах ці бясплоднасьці, летальных вынікаў ад страты крыві.

Паказаць камэнтары

XS
SM
MD
LG