Лінкі ўнівэрсальнага доступу

Патрыярх маскоўскі Кірыл назваў ерасьсю абарону правоў чалавека і «чалавекапаклонства»


Патрыярх Кірыл назваў ерасьсю «чалавекапаклонства» і абарону правоў чалавека. «Яны выганяюць Бога з жыцьця людзей», заявіў ён, выступаючы пасьля літургіі ў храме Хрыста Збаўцы ў сьвята Таржаства праваслаўя.

Патрыярх нагадаў, што ў Новым часе ўнівэрсальным крытэрыем ісьціны стаў чалавек і яго правы, «і пачалося рэвалюцыйнае выгнаньне Бога з чалавечага жыцьця, з жыцьця грамадзтва», і гэты рух спачатку ахапіў Заходнюю Эўропу, Амэрыку, а затым і Расею.

На думку кіраўніка Расейскай праваслаўнай царквы, сёньня «ў маштабах цэлай плянэты разьвіваецца ідэя жыцьця бяз Бога». У многіх «квітнеючых краінах», сьцьвярджае ён, «робяцца намаганьні законам зацьвердзіць права любога выбару чалавека, у тым ліку і самага грахоўнага».

«Сёньня, — цытуе патрыярха „Інтэрфакс“, — мы кажам аб глябальнай ерасі чалавекапаклонства, новага ідалапаклонства, якое выганяе Бога з чалавечага жыцьця. Нічога падобнага ў глябальным маштабе ніколі не было. Менавіта на пераадоленьне гэтай ерасі сучаснасьці, наступствы якой могуць мець апакаліптычныя падзеі, царква мусіць накіроўваць сілу сваёй абароны, свайго слова, сваёй думкі».

Паказаць камэнтары

XS
SM
MD
LG