Лінкі ўнівэрсальнага доступу

Гомельскага фрылансэра Кастуся Жукоўскага аштрафавалі сёлета шосты раз. Сума штрафаў дасягнула 45,7 мільёна рублёў


Кастусь Жукоўскі

Кастусь Жукоўскі

17 сакавіка судзьдзя Мазырскага раённага суду Натальля Асадчая прызнала гомельскага журналіста-фрылансэра Кастуся Жукоўскага вінаватым у незаконным вырабе прадукцыі СМІ для тэлеканалу «Белсат» без акрэдытацыі і аштрафавала яго на падставе часткі 2 артыкула 22.9 КаАП на 35 базавых велічыняў (7 мільёнаў 350 тысяч рублёў).

«Суд праходзіў без майго ўдзелу. У мяне сапсавалася машына, і я праз тэлефон папярэдзіў сакратарку суду, што не змагу прыехаць. Думаю, што мая прысутнасьць нічога б не зьмяніла. У нашых судах такі парадак: ёсьць пратакол — штрафуюць. Дзейнічае перасьлед спэцслужбамі незалежных журналістаў, адпаведна й судовы канвэер. І ніякія аргумэнты ні адказчыка, ні адваката ня дзейнічаюць. Ніводзін судзьдзя — сёлета ў мяне гэта шосты суд — не зьвяртае ўвагі ані на Канстытуцыю, ані на міжнародныя пагадненьні, якія падпісала Беларусь у галіне захаваньня правоў чалавека, у тым ліку й права на збор і распаўсюд інфармацыі», — кажа Жукоўскі.

Пра суд фрылансэр дазнаўся праз SMS-паведамленьне. Раней старшы ўчастковы інспэктар Мазырскага РАУС, маёр міліцыі Алег Вяргацкі тэлефанаваў фрылансэру і патрабаваў прыехаць у Мазыр дзеля складаньня адміністрацыйнага пратаколу нібыта за незаконны выраб і распаўсюд прадукцыі СМІ. Меўся на ўвазе паказаны 9 лютага на тэлеканале «Белсат» навінны сюжэт «Мазыр: сьпіртзавод банкрутуе».

«Памятаеце, вы рабілі там рэпартаж на сьпіртзаводзе?» — пытаўся ўчастковы інспэктар.

Жукоўскі патлумачыў, што не прыедзе, паколькі міліцыя не аплачвае яму праезд.

Пратакол быў складзены паводле трафарэту, без высьвятленьня істотных акалічнасьцяў: зьяўляецца ці не зьяўляецца Жукоўскі штатным супрацоўнікам «Белсату», дасылаў ён ці не дасылаў відэаздымкі тэлеканалу альбо той скарыстаў іх, узяўшы з сацыяльнай сеткі? Выглядае, не высьвятлялася гэта і падчас суду: ёсьць пратакол — атрымай штраф.

Апроч Мазыра, сёлета Кастуся Жукоўскага судзілі за так званы «незаконны выраб прадукцыі СМІ» ў Калінкавічах, Карме, Буда-Кашалёве і двойчы ў Жлобіне. Сума штрафаў склала 45 мільёнаў 700 тысяч рублёў, а з улікам мінулагодніх пакараньняў, таксама за выраб прадукцыі СМІ без акрэдытацыі, яна дасягнула 77 мільёнаў 700 тысяч рублёў.

XS
SM
MD
LG