Лінкі ўнівэрсальнага доступу

Старшынёй БСДП (Грамада) пераабраная Ірына Вештард


Ірына Вештард выступае на зьезьдзе.

Ірына Вештард выступае на зьезьдзе.

Але падчас галасаваньня яе перавага над галоўным альтэрнатыўным кандыдатам Ігарам Маслоўскім, якога некаторыя партыйцы называюць чалавекам «Гавары праўду» і абвінавачваюць у спробах захопу партыі, была невялікай.

У выніку 16-га зьезду Беларускай сацыял-дэмакратычнай партыі (Грамада), які адбыўся сёньня ў Менску ў Міжнародным адукацыйным цэнтры імя Яганэса Раў, старшынёй трэці раз пераабраная Ірына Вештард.

На пасаду старшыні было вылучана 7 чалавек. Самаадвод узялі Анатоль Сідарэвіч, Павал Знавец, Вячаслаў Болбат. Аляксей Сігаеў зьняў сваю кандыдатуру на карысць Ірыны Вештард.

Таемнае галасаваньне вялося паміж кандыдатурамі дзейнай старшыні Ірыны Вештард, намесьнікам старшыні Ігара Маслоўскага, а таксама Віктара Крываля.

За Ірыну Вештард прагаласавала 42 дэлегаты зьезда, супраць — 40.

За Ігара Маслоўскага — 38, супраць 44.

За Віктара Крываля — 0, супраць — 82.

Галасаваньне па адным з пытаньняў на зьезьдзе.

Галасаваньне па адным з пытаньняў на зьезьдзе.

Я імкнулася рабіць і магчымае, і немагчымае.

Самым нешматслоўным быў «перадвыбарчы» выступ Ірыны Вештард: «Па-чалавечы шчыра кажу, мне падаецца, я заўжды была адказным чалавекам, імкнулася рабіць і магчымае, і немагчымае. З такой жа адказнасьцю буду працаваць надалей», — сказала Ірына Вештард.

Супраць кандыдатуры Вештард выступіла сяброўка партыі з Гомельскай вобласьці. «Ані разу не прыехала ў Гомельскую вобласьць, а толькі з інспэкцыяй, — заявіла спадарыня. — Яна гадзінамі размаўляе са мной па тэлефоне, і толькі распавядае, як ёй цяжка. Для яе коска ў пратаколе важней за чалавечыя стасункі».

Калі яна прымала партыю, партыя ляжала ў рэанімацыі.

Падтрымаў дзейную старшыню колішні старшыня Вярхоўнага Савету Беларусі Мечыслаў Грыб. «Сорамна прысутнічаць на гэтым зьезьдзе, калі мы адзін на аднаго такія вёдры бруду выліваем, — заявіў Грыб. — Нейкіх людзей сёньня не пазнаю. Усе мы не без грахоў. Ірыну Зянонаўну ведаю даўно. Ведаю як сумленнага чалавека. Калі яна прымала партыю, партыя ляжала ў рэанімацыі. Яна амаль ня дыхала, яе амаль не было, яе вось-вось павінны былі скасаваць. Быў нуль і з гэтага нуля сёньня зрабілі партыю...»

Мечыслаў Грыб (зьлева)

Мечыслаў Грыб (зьлева)

Прадстаўнік Берасьцейшчыны Ігар Маслоўскі, якога некаторыя партыйцы называюць чалавекам «Гавары праўду», абяцаў «падвысіць узровень падтрымкі партыі ў грамадзтве».

Прадстаўнік Берасьцейшчыны Ігар Маслоўскі, якога некаторыя партыйцы называюць чалавекам «Гавары праўду» і абвінавачваюць у спробах захопу партыі, выкарыстаў час на выступ для агучваньня сваёй праграмы. Маслоўскі абяцаў «падвысіць узровень падтрымкі партыі ў грамадзтве», «павялічыць колькасьць сяброў партыі» і разьвіваць стасункі з унутранымі і замежнымі партнэрамі. Ён назваў колькасьць сяброў партыі «крытычнай» (паводле Вештард, сьпіскавая колькасьць сяброў — 1152 чалавекі), а ў якасьці агітацыйных матэрыялаў раздаў у залі фотаздымкі сваёй прысутнасьці на Майдане ў Кіеве.

Леанід Дубаносаў зь Мікашэвічаў выступіў за кандыдатуру Маслоўскага. «Я кожны тыдзень бачу дзейнасьць Маслоўскага. Гэта канкрэтныя справы і канкрэтныя посьпехі», — заявіў Дубаносаў.

«Ігар Уладзімеравіч ( Маслоўскі — РС) — пасеяў сярод нас варажнечу», — заявіў Павал Знавец, які моцна абурыўся, што Маслоўскі назваў яго «гора-аналітыкам». Сам Знавец падтрымліваў на выбарах кандыдатуру Ірыны Вештард.

Віктар Крываль выкарыстаў свой выступ для выказваньня агульнакрытычнай пазыцыі наконт дзеяньняў партыі.

Нягледзячы на гарачыя спрэчкі па працэдурных пытаньнях і намёкі на патэнцыйны скандал у партыі падчас зьезду, само мерапрыемства прайшло без эксцэсаў. У зьезьдзе ўзялі ўдзел 82 дэлегаты.

Дыскусія паміж дэлегатамі зьезду.

Дыскусія паміж дэлегатамі зьезду.

Ірына Зяноўнана Вештард нарадзілася 17 сакавіка 1953 года ў вёсцы Багушы Смаргонскага раёна. Паводле прафэсіі хімік, працавала настаўніцай. У БСДП з 1991 году. У 2011 упершыню абраная старшынёй.

Паказаць камэнтары

XS
SM
MD
LG