«Калі сёньня мне не дадуць сказаць апошняе слова, ад заўтрашняга дня пачну сухую галадоўку», — сказала Саўчанка. Раней суд на паседжаньні адклаў справу да 9 сакавіка — тады плянуецца даць слова падсуднай.
Адвакат лётчыцы Ільля Новікаў заявіў Радыё Свабода, што абарона ня будзе абскарджваць прысуд:
«Мы ня будзем абскарджваць прысуд не таму, што Надзея вінаватая, — адзначыў адвакат. — Пры падтрымцы дружалюбных нам і Украіне арганізацый нам удасца дамагчыся вызваленьня Саўчанкі».
Расея ўжо дала зразумець: пакуль прысуд не ўступае ў сілу, размовы аб абмене не пачынаюцца.
Новікаў растлумачыў журналістам, што адмова ад абскарджаньня — рашэнне самой Саўчанкі. Для яе гэта ў першую чаргу скарачэньне тэрміну пачатку перамоў аб абмене. «Расея ўжо дала зразумець: пакуль прысуд не ўступае ў сілу, размовы аб абмене не пачынаюцца», — падкрэсліў адвакат.
Ён дадаў, што абскардзіць прысуд — значыць паказаць, што ў Саўчанкі захоўваецца хоць бы гіпатэтычная вера ў расейскае правасудзьдзе.
У Расеі Надзею Саўчанку абвінавачваюць у датычнасьці да забойства двух расейскіх журналістаў пад Луганскам: яна нібыта вяла карэкціроўку артылерыйскага агню, калі яны былі забітыя разам зь некалькімі мірнымі мясцовымі жыхарамі. Пасьля абстрэлу Саўчанка без дакумэнтаў пад выглядам уцякачкі нібыта перасекла мяжу Расеі, дзе і была затрыманая.
Саўчанка гэтыя абвінавачваньні абвяргае і сьцьвярджае, што той час, калі загінулі журналісты, яна ўжо была захоплена сэпаратыстамі «ЛНР», якія затым пераправілі яе ў Расею.
