Лінкі ўнівэрсальнага доступу

За хабар затрыманы намесьнік гендырэктара па камэрцыі аб’яднаньня «Барысаўдрэў»


Пра арышт паведамілі ў прэсавай службе Менскай абласной міліцыі, але прозьвішча затрыманага не назвалі.

На «Барысаўдрэве» карэспандэнту «Свабоды» сказалі, што затрыманы намесьнік гендырэктара па камэрцыі Ігар Пракаповіч.

«Так, ведаем, што ён затрыманы, але падрабязнасьцяў ня ведаем, бо гэта было не ў Барысаве, а ў вас у Менску. Нічога не камэнтуем», — сказаў намесьнік гендырэктара па вытворчасьці Аляксандр Валкавец.

Прозьвішча намесьніка гендырэктара па камэрцыйных пытаньнях Ігара Пракаповіча яшчэ не прыбрана з сайту «Барысаўдрэва». Вядома, што на пасаду Ігар Пракаповіч заступіў у кастрычніку мінулага году разам з новай камандай, якую ўзначаліў цяперашні гендырэктар Аляксандар Елсукоў. Да таго працаваў на прадпрыемстве.

Паводле прэсавай службы Менскай абласной управы міліцыі, Ігар Пракаповіч быў затрыманы 1 сакавіка пад Менскам у пасёлку Атоліна пры атрыманьні 24 мільёнаў рублёў. Міліцыянты лічаць, што гэта быў хабар ад прадстаўніка будаўнічай фірмы, якая па дамове выконвала для «Барысаўдрэва» рамонтныя і будаўнічыя працы. Ці прызнае Ігар Пракаповіч сябе вінаватым, невядома.

«Барысаўдрэў» не ўпершыню апынаецца ў цэнтры карупцыйных ды іншых скандалаў. У 2013 годзе Аляксандар Лукашэнка абвінаваціў шэраг высокапастаўленых чыноўнікаў у зрыве праграмы мадэрнізацыі прадпрыемства, пасьля чаго сваіх пасад пазбавіліся старшыня Менаблвыканкаму Барыс Батура, гендырэктар канцэрну «Белпаперапрам» Аляксандар Пераслаўцаў і намесьнік кіраўніка адміністрацыі Лукашэнкі Андрэй Тур.

Менш як праз паўгода паводле падазрэньняў у злоўжываньні ды іншых злачынствах быў арыштаваны гендырэктар «Барысаўдрэва» Ўладзімер Мальцаў, якому давялося адбыць за кратамі амаль паўтара года. Маладога дырэктара асудзілі на 3 гады зьняволеньня, вызвалілі датэрмінова. У судзе Ўладзімер Мальцаў сваёй віны не прызнаў і ў калёніі таксама ня стаў зьвяртацца да Аляксандра Лукашэнкі з прашэньнем аб памілаваньні. Паводле дасьведчаных крыніц, цяпер Уладзімер Мальцаў працуе ў Расеі паводле інжынэрна-тэхнічнай адукацыі.

Аб’яднаньне «Барысаўдрэў» і пасьля праведзенай мадэрнізацыі не пазбавілася шматлікіх праблем з вытворчасьцю і рэалізацыяй сваёй прадукцыі. Жыхар Барысава пра справы на прадпрыемстве сказаў:

«Як паўсюль, цяжка, нават ёсьць затрымкі з заробкамі».

XS
SM
MD
LG