Лінкі ўнівэрсальнага доступу

Пасьля менскіх пагадненьняў Украіна страціла больш за 400 вайскоўцаў


Ілюстрацыйнае фота

Ілюстрацыйнае фота

ЗША назіраюць «значнае» ўзмацненьне сутыкненьняў на ўсходзе Ўкраіны.

Больш за 400 украінскіх вайскоўцаў загінулі ў выніку баявых дзеяньняў на Данбасе пасьля ўступленьня ў сілу пагадненьня аб спыненьні агню, дасягнутага ў Менску год таму, паведамляе «Голас Амэрыкі».

Намесьнік памочніка міністра абароны ЗША Майкл Карпэнтэр, у веданьні якога знаходзяцца пытаньні, зьвязаныя з Украінай, Расеяй і Эўразіяй, заявіў, што ЗША назіраюць «значнае» ўзмацненьне сутыкненьняў на ўсходзе Ўкраіны. Паводле яго слоў, нягледзячы на леташняе пагадненьне аб спыненьні агню, узброеныя сілы Ўкраіны страцілі ня менш за 430 чалавек у сутыкненьнях з сэпаратыстамі.

«Расея падтрымлівае камандныя і кіраўніцкія сувязі з сэпаратыстамі, якіх яна падтрымлівае ва ўсходняй Украіне», — заявіў Карпэнтэр «Голасу Амэрыкі».

Расея пастаўляе на ўкраінскі Данбас цяжкае ўзбраеньне, адначасова займаючыся навучаньнем і кіраваньнем сэпаратыстамі з дапамогай «сілы, якая прысутнічае ва ўсходняй Украіне».

«Гэта праблема, якая заахвочваецца Расеяй», — сказаў Карпэнтэр.

Сэпаратысты, якіх падтрымлівае Расея, за апошні тыдзень ажыцьцявілі сотні нападаў на ўсходзе Ўкраіны.

Выступаючы перад камітэтам Сэнату па ўзброеных сілах у аўторак, кіраўнік Эўрапейскага камандаваньня Філіп Брыдлаў заявіў, што за папярэднія суткі была праведзена 71 атака, а за папярэднія сем дзён — каля 450 нападаў.

Брыдлаў паведаміў журналістам у Пэнтагоне у аўторак аб зьяўленьні «трывожных тэндэнцыяў». Ён адзначыў атакі ў рэгіёнах, дзе да гэтага было спакойна, а таксама ўжываньне зброі, якая павінна быць забароненая.

Нягледзячы на гэтыя тэндэнцыі і рэкамэндацыі Брыдлава, якія ўключаюць перадачу летальнай зброі ўкраінскай арміі, адміністрацыя Абамы пакуль не ўключыла летальную зброю ў свае пастаўкі Ўкраіне.

Ключавыя словы: менскія пагадненьні, Брыдлаў, Україна, Карпэнтэр, Данбас, Расея

XS
SM
MD
LG