Лінкі ўнівэрсальнага доступу

У «Пэрспэктывы» ўзьнікае канкурэнт для аб’яднаньня прадпрымальнікаў


Вячаслаў Сіўчык (зьлева) і Алесь Макаеў (справа)

Вячаслаў Сіўчык (зьлева) і Алесь Макаеў (справа)

Беларускі рух салідарнасьці «Разам» правёў 1 сакавіка ў Гомелі ўстаноўчы сход па стварэньні рэгіянальнай структуры, паведамляе БелаПАН. У сходзе ўзялі ўдзел кіраўнік руху Вячаслаў Сіўчык, ягоны намесьнік Алесь Макаеў, прадстаўнікі Мазыра, Сьветлагорска і Калінкавічаў. Рэгіянальным каардынатарам абраны сьветлагарчанін Юры Ляшэнка.

«Цяпер паўстала неабходнасьць узмацніць работу, ствараць структуры, каб аб’ядноўваць людзей для супольнага адказу выклікам сучаснасьці, такім як вострыя праблемы ў ІП у сувязі з указам № 222, — казаў прадпрымальнік Алесь Макаеў. — Будзем ствараць структуры ў рэгіёнах, правядзем рэспубліканскі сход.

Дзейнасьць руху грунтуецца на падтрымцы беларускай мовы, культуры і гісторыі, прадпрымальніцтва, патрабаваньняў аб вызваленьні палітычных зьняволеных, а цяпер гэта Міхал Жамчужны і Андрэй Бандарэнка».

Макаеў адзначыў, што раней на Гомельшчыне былі асобныя людзі, якія падтрымлівалі рух і праводзілі акцыі, напрыклад, у памяць аб ахвярах сталінскіх рэпрэсіяў.

Рух салідарнасьці "Разам" праводзіць акцыю памяці да Дня ахвяраў палітычных рэпрэсій. Менск, 29 кастрычніка 2015 году

Рух салідарнасьці "Разам" праводзіць акцыю памяці да Дня ахвяраў палітычных рэпрэсій. Менск, 29 кастрычніка 2015 году



На сходзе былі прынятыя рэзалюцыі: «У падтрымку беларускіх прадпрымальнікаў», «Свабоду Андрэю Бандарэнку і Міхаілу Жамчужнаму», «Зварот да грамадзян Беларусі з заклікам уступіць у рух салідарнасьці „Разам“» і «Да кангрэсу дэмакратычных сіл».

Ляшэнка заявіў, што скіруе сваю дзейнасьць на каардынацыю працы па рашэньні праблем прадпрымальнікаў, якіх цяпер «агромністая армія», але пакуль разьяднаная і пасіўная.

«Разам» з «Пэрспэктывай» ці канкурэнт «Пэрспэктывы»?

Рух салідарнасьці «Разам» дзейнічае ўжо 10 гадоў, згадвае палітычны актывіст Вячаслаў Сіўчык у гутарцы з карэспандэнтам Свабоды, рух зарэгістраваны ў Чэхіі, Польшчы і Літве, мае структуры ва Ўкраіне, праводзіць акцыі па ўсёй Беларусі. На рэспубліканскім аргкамітэце будзе прынятае рашэньне пра ўдзел ці няўдзел у парлямэнцкіх выбарах (імі, кажа Сіўчык, як і раней, могуць скарыстацца дзеля адстойваньня інтарэсаў прадпрымальнікаў). Цяпер ладзіцца рэарганізацыя руху, будзе зьмененае кіраўніцтва, а стварэньне рэгіянальных структураў праводзіцца таму, што раней гэтыя структуры не былі фармалізаваныя.

Вячаслаў Сіўчык (справа) на мітынгу ў Менску

Вячаслаў Сіўчык (справа) на мітынгу ў Менску

Адна з рэзалюцыяў — пра прадпрымальнікаў. Іншыя дзьве — з заклікам далучацца і кансалідавацца, яшчэ адна пра палітвязьняў. Ці значыць гэта, што рух салідарнасьці «Разам» хоча заняць месца грамадзкага аб’яднаньня «Пэрспэктыва», якое адстойвае інтарэсы прадпрымальнікаў, альбо што рух хоча далучыцца да «Пэрспэктывы»?

«Нашыя калегі з Гомеля ніяк не зьмянялі традыцыйную пазыцыю руху салідарнасьці „Разам“, мы заўсёды дапамагалі барацьбе беларускіх прадпрымальнікаў за свае правы, рэзалюцыя традыцыйная для руху салідарнасьці, — кажа Сіўчык. — Удзельнікі сходу падтрымлівалі патрабаваньні прадпрымальнікаў, прынятыя падчас мітынгаў на Кастрычніцкай плошчы 15, 22 і 28 лютага, яны ня вераць у дзеяздольнасьць працоўнай групы пры Міністэрстве эканомікі і падтрымліваюць прапанову па яе роспуску і стварэньні новай перамоўнай групы. І, натуральна, падтрымалі акцыю 14 сакавіка ў Менску, бо рух салідарнасьці „Разам“ падтрымліваў любыя акцыі, накіраваныя ў абарону беларускіх прадпрымальнікаў.

Няважна, якая з грамадзкіх арганізацыяў спрабуе адстойваць інтарэсы беларускіх прадпрымальнікаў, а важна, якая адбылася трагедыя для беларускага грамадзтва — зьнішчаецца гэты важны для Беларусі пласт, ІП, што ўжо прывяло да масавай міграцыі людзей у Расею. Мы губляем найлепшых нашых людзей! І гэтая трагедыя мусіць кансалідаваць усіх, як прадпрымальніцкіх лідэраў, так і любыя беларускія грамадзкія сілы».

Некаторыя прадпрымальнікі стаміліся ад двух месяцаў страйку і спрабуюць на свой страх і рызыку выходзіць на працу. Ці ня позна прымаць рэзалюцыі ў падтрымку ІП?

«Яшчэ ў сьнежні мы зьвярталіся да ўсіх лідэраў прадпрымальніцкага руху, іншых арганізацыяў, каб яны разам сабраліся і разам вызначылі фармат вулічных дзеяньняў, дату правядзеньня Плошчы, — нагадвае Сіўчык. — Ужо ў лістападзе было зразумела, што ўлады ня будуць саступаць і што патрэбныя вулічныя акцыі. На жаль, нас ніхто не пачуў і падзеі пайшлі іншым шляхам. Сапраўды, ужо вельмі вялікія страты нанесеныя беларускаму грамадзтву».

XS
SM
MD
LG