Актывісты руху салідарнасьці «Разам» у Гомелі на сходзе актывістаў арганізацыі заявілі пра падтрымку прадпрымальнікаў і выказаліся за правядзеньне Кангрэсу дэмакратычных сілаў. Пра гэта Свабодзе паведаміў адзін з кіраўнікоў арганізацыі ў Менску, прадпрымальнік Аляксандар Макаеў.
«Актывісты руху выказаліся за тое, што падмуркам у правядзеньні Кангрэсу дэмакратычных сілаў мае быць Канстытуцыя Беларусі 1994 году. Форум дэмакратычных сілаў, у сваю чаргу, мае падтрымаць Віленскі мэмарандум „Аб захадах па забесьпячэньні незалежнасьці Беларусі“. Гэта асабліва важна з гледзішча падзеяў ва Украіне. Пуцінскі рэжым сёньня ёсьць пагрозай для Беларусі, а таму мы заклікаем беларусаў да актывізацыі высілкаў у справе абароны незалежнасьці краіны».
Як паведаміў Аляксандар Макаеў, гомельскія актывісты «Разам» заклікалі праваабаронцаў і людзей добрай волі падтрымаць прадпрымальнікаў у адстойваньні іхніх правоў, а таксама — прызнаць праваабаронцаў Андрэя Бандарэнку і Міхаіла Жамчужнага палітычнымі вязьнямі і дамагацца іх неадкладнага вызваленьня.
