Лінкі ўнівэрсальнага доступу

The Rolling Stones дадуць бясплатны канцэрт на Кубе на Дзень волі


The Rolling Stones

The Rolling Stones

Гэта адбудзецца неўзабаве пасьля першага за 88 год візыту на Кубу прэзыдэнта ЗША.

Амэрыканскі рок-гурт The Rolling Stones анансаваў бясплатны канцэрт у Гаване (Куба) 25 сакавіка. Першы ў гісторыі кубінскі канцэрт гурту пройдзе на стадыёне Coliseo de la Ciudad Deportiva, будзе зьнятая відэавэрсія канцэрту.

«Мы выступалі ў многіх спэцыфічных месцах падчас нашай доўгай кар’еры, але гэтае шоў у Гаване будзе знакавай падзеяй для нас, і, мы спадзяемся, для ўсіх нашых сяброў на Кубе таксама», — заяўляе гурт.

Канцэрт пройдзе празь некалькі дзён пасьля гістарычнага візыту на Кубу Барака Абамы — першага візыту прэзыдэнта ЗША за 88 год. Незадоўга да анонсу візыту Куба і ЗША аднавілі авіязносіны. Дыпляматычныя адносіны між краінамі былі адноўленыя улетку 2015 году, пасьля перапынку ад 1961 году.

Ад 2006 году Кубай кіруе Рауль Кастра — у сувязі зь цяжкай хваробай свайго брата Фідэля, які кіраваў краінай пасьля перамогі рэвалюцыі ў 1959 годзе. Хоць Рауль Кастра заяўляе, што не падтрымлівае ідэі капіталізму і ня здрадзіць рэвалюцыі, у сацыялістычнай краіне праводзяцца некаторыя капіталістычныя і дэмакратычныя рэформы. Ён нават абяцае сысьці з пасады Кіраўніка Дзяржсавету па заканчэньні другога тэрміну ў 2018 годзе, каб кубінцы ад яго «не стаміліся». Але разам з пэўнай лібэралізацыяй на Кубе не спынілася цэнзура, ня сьціхлі палітычныя рэпрэсіі, на вулічных акцыях адбываюцца масавыя затрыманьні.

Паказаць камэнтары

XS
SM
MD
LG