24 лютага ў Шаўчэнкаўскім раённым судзе Кіева адбылося паседжаньне працэсу над добраахвотнікам тактычнае групы «Беларусь» Васілём Парфянковым. Былога беларускага палітвязьня абвінавачваюць паводле часткі 2 артыкулу 296 Крымінальнага кодэксу Украіны (хуліганства), якая прадугледжвае 4 гады зьняволеньня.
Васіль Парфянкоў быў адным з удзельнікаў акцыі пагрому расейскіх банкаў у гадавіну масавага расстрэлу пратэстоўцаў падчас Рэвалюцыі Годнасьці. Акцыя адбылася паводле ініцыятывы камандзіра добраахвотнага батальёну Арганізацыі ўкраінскіх нацыяналістаў Міколы Каханіўскага. Спадар Каханіўскі таксама прыйшоў на суд, дзе супрацоўнікі паліцыі ўручылі яму выклік да суду ў якасьці падазраванага.
Сёньня суд выбіраў меру стрыманьня для Парфянкова. Пракуроры дамагаліся адпраўкі яго у сьледчы ізалятар, матывуючы гэта тым, што падсудны — іншаземец з магчымасьцю ўцячы за мяжу, якая падмацоўваецца адсутнасьцю сталых сацыяльных сувязяў ва Ўкраіне. Адвакат прадставіў пісьмовыя гарантыі ад народных дэпутатаў, а таксама сьведчаньні аднапалчан Парфянкова, якія і зьяўляюцца ягонымі сацыяльнымі сувязямі ва Ўкраіне. Акрамя таго, паводле словаў адваката, Парфянкоў ня дзейнічаў зь мэтай выказаць непавагу да грамадзтва Ўкраіны — наадварот, ён выражаў пратэст супраць бізнэсу афіцыйна прызнанай дзяржавы-агрэсара.
Сам Парфянкоў з усьмешкаю дадаў, што ня можа ўцячы ў Беларусь, паколькі там яму пагражае не 4, а больш гадоў турмы.
Судзьдзя таксама нагадаў абвінавачаньню, што чалавек, які не уцякаў ад законнага перасьледу органамі правапарадку і не быў крымінальна асуджаны, ня можа быць адпраўлены ў сьледчы ізалятар паводле артыкулу, які прадугледжвае менш за 5 год зьняволеньня.
Пад час паседжаньня выступілі дэпутаты парляменту, якія запрапанавалі ўзяць Парфянкова на парукі і старшыня батальёну АЎН Мікола Каханіўскі.
Пасьля нарады судзя абвесьціў рашэньне: хатні арышт на працягу 2 месяцаў.
