Лінкі ўнівэрсальнага доступу

Міхалевіч: Уладам патрэбныя эўрапейскія грошы і крэдыты, а санкцыі — гэта другаснае


Алесь Міхалевіч

Алесь Міхалевіч

Сьледчы, які вядзе крымінальную справу былога кандыдата ў прэзыдэнты Алеся Міхалевіча, паведаміў яму, што тэрмін вядзеньня сьледзтва падоўжаны яшчэ на месяц — да 10 сакавіка.

«Сьледзтва павінна было скончыцца 10 лютага. Але цяпер працягнута яшчэ на адзін месяц. Чым далей вядзецца сьледзтва, тым з больш высокага дазволу яно падаўжаецца. То бок пасьля пэўнага часу для працягу сьледзтва патрэбны дазвол генэральнага пракурора», — патлумачыў Міхалевіч.

Алесь Міхалевіч застаецца ў статусе абвінавачваемага паводле крымінальнай справы аб масавых беспарадках 19 сьнежня 2010 году:

Я хіба апошні, хто яшчэ застаўся ў гэтай крымінальнай справе.

«Я хіба апошні, хто яшчэ застаўся ў гэтай крымінальнай справе. Пасьля майго ад’езду ў 2011 годзе мая частка справы была вылучаная ў асобную вытворчасьць, якая вядзецца да гэтага часу».

Алесь Міхалевіч кажа, што варыянтаў далейшых падзеяў, зьвязаных зь яго крымінальнай справай, некалькі:

«Могуць працягнуць сьледзтва далей. Могуць перадаць справу ў суд. Могуць зьняць абвінавачваньні і закрыць справу праз адсутнасьць складу злачынства. На вялікі жаль, ёсьць варыянт, які быў выкарыстаны ў дачыненьні да журналіста Аляксандра Алесіна, — прыпыненьне справы праз адсутнасьць магчымасьці далейшага правядзеньня сьледчых дзеяньняў».

Палітык гаворыць, што рашэньне аб адмене эўрапейскіх санкцыяў павінна было б быць падмацаванае канкрэтнымі крокамі з боку афіцыйнага Менску. Напрыклад, можна было б закрыць усе справы, зьвязаныя з падзеямі 19 сьнежня 2010 году:

Я перакананы, што афіцыйны Менск задаволены зьняцьцём санкцыяў — гэта паляпшае шансы на пошук сродкаў.

«Санкцыі — гэта толькі невялікая частка адносінаў Беларусі з Эўрапейскім Зьвязам. Перш за ўсё мы павінны гаварыць пра тое, што цікавіць беларускія ўлады, — пра грошы і крэдыты. Я перакананы, што афіцыйны Менск задаволены зьняцьцём санкцыяў — гэта паляпшае шансы на пошук сродкаў. Што тычыцца мяне, мне не падабаецца, што я застаюся абвінавачаным паводле крымінальнай справы, а санкцыі зьнятыя. Мне б хацелася, каб афіцыйны Менск зрабіў нешта вельмі канкрэтнае. Напрыклад, пазакрываў крымінальныя справы, з-за якіх і была ўведзеная значная частка гэтых санкцыяў».

XS
SM
MD
LG