Лінкі ўнівэрсальнага доступу

Расейскі генэрал: Нам ня трэба дапускаць прыходу празаходніх сілаў да ўлады ў Беларусі


Ілюстрацыйнае фота, расейскія зьнішчальнікі Су-27

Ілюстрацыйнае фота, расейскія зьнішчальнікі Су-27

Адсутнасьць расейскай авіябазы ў Беларусі ня стане для Расеі праблемай, але гэтае пытаньне застаецца актуальным для Масквы.

Такое меркаваньне агучвае расейскае інфармацыйнае агенцтва EADaily.

Прэзыдэнт Акадэміі геапалітычных праблемаў, былы начальнік Галоўнага ўпраўленьня міжнароднага ваеннага супрацоўніцтва Мінабароны РФ генэрал-палкоўнік Леанід Івашоў заявіў агенцтву, што фармальная адсутнасьць авіябазы не перашкаджае разьвіцьцю ваеннага супрацоўніцтва дзьвюх дзяржаваў.

Нам ня трэба дапускаць прыходу празаходніх сілаў да ўлады ў Беларусі, каб не атрымалася, як ва Ўкраіне.

«Калі Аляксандру Рыгоравічу ідэя разьмяшчэньня авіябазы не асабліва падабаецца, і ён разглядае гэта як нейкае ўшчамленьне свайго сувэрэнітэту, то юрыдычнага афармленьня ваеннай базы ня трэба. Проста трэба разьвіваць адзіную абаронную прастору. А яна ёсьць — працуе сумесная калегія міністэрстваў абароны, узаемадзейнічаюць генэральныя штабы, у ходзе вучэньняў, камандна-штабных гульняў адпрацоўваюцца пытаньні забесьпячэньня бясьпекі як Беларусі, так і нашага заходняга стратэгічнага кірунку, уключаючы і прыбалтыйскі. А калі ўжо сапраўды паўстане пагроза, то перадысьлякаваць шэраг частак, і ня толькі авіяцыйных, будзе нескладана. Зь іншага боку, нам сёньня трэба дапамагаць умацаваньню беларускіх узброеных сілаў», — сказаў Івашоў.

На думку Івашова, каб ваеннае супрацоўніцтва дзьвюх краінаў не было пастаўлена пад пагрозу, Расея павінна цалкам выключыць сцэнар прыходу да ўлады ў Беларусі празаходніх сілаў:

«Нам ня трэба дапускаць прыходу празаходніх сілаў да ўлады ў Беларусі, каб не атрымалася, як ва Ўкраіне. Мы ж павінны здабываць нейкую карысьць са сваіх паразаў. Таму трэба працаваць над гэтым, а ў аснову супрацоўніцтва зь Беларусьсю ў рамках Саюзнай дзяржавы ставіць не эканоміку, якая разьядноўвае народы, а гуманітарную сфэру, культуру, навуку, адукацыю і сумесныя тэхналёгіі. А мы толькі і робім, што спрабуем ў Лукашэнкі забраць яго эфэктыўныя прадпрыемствы і падпарадкаваць іх нашай алігархіі», — адзначыў ён.

Адначасова EADaily публікуе інтэрвію галоўнага рэдактара часопіса «Нацыянальная абарона» Ігара Каротчанка, у якім ён кажа, што пытаньне расейскай авіябазы застаецца актуальным для Масквы.

Разьлічваем, што нашы беларускія калегі, нягледзячы на палітычную каньюнктуру і жаданьне спадабацца Эўропе, усё ж выканаюць дасягнутыя дамоўленасьці.

«Я думаю, што з пункту забесьпячэньня ваенных інтарэсаў Саюзнай дзяржавы, інтарэсаў самой Беларусі, а таксама інтарэсаў Расеі адкрыцьцё расейскай авіябазы ў Беларусі — па-ранейшаму актуальнае пытаньне. Гэта пытаньне забесьпячэньня нацыянальнай бясьпекі як для Масквы, так і для Менску. Разьлічваем, што нашы беларускія калегі, нягледзячы на палітычную каньюнктуру і жаданьне спадабацца Эўропе, усё ж выканаюць дасягнутыя дамоўленасьці», — сказаў Каротчанка.

Паводле слоў галоўнага рэдактара, «Аляксандар Лукашэнка як мудры палітык павінен разумець, што ён ніколі ня будзе для Захаду сваім». «Пры любой найменшай магчымасьці ЗША і Эўразьвяз запусьцяць мэханізм каляровай рэвалюцыі ў Менску для таго, каб зрынуць Лукашэнку, і яго лёс будзе вельмі сумны. Аляксандар Рыгоравіч павінен разумець, што адзіны тыл, адзіны саюзьнік для яго — гэта Расея, сумесна зь якой ён можа абараняць і нацыянальны сувэрэнітэт Беларусі. Толькі так, і няйначай», — падкрэсьліў Каротчанка.

Паказаць камэнтары

XS
SM
MD
LG