Лінкі ўнівэрсальнага доступу

15 нябачных пагрозаў і выгадаў для жыцьця на Зямлі


Выгляд Зямлі ўзімку зь міжнароднай касьмічнай станцыі. Фота амэрыканскага нацыянальнага касьмічнага агенцтва NASA.

Група экспэртаў склала сьпіс зь пятнаццаці «тэм глябальнай важнасьці, якія застаюцца малавядомымі ў колах навукоўцаў, палітыкаў і спэцыялістаў па захаваньні і аднаўленьні біяразнастайнасьці», паведамляе ў гішпанскай газэце El Pais журналіст Хавіер Саляс.

Групай кіруе Ўільям Сазэрлэнд, прэзыдэнт брытанскага Экалягічнага таварыства.

Газэта пералічае ўсе 15 пазыцый. Пераважна гэта зьявы, паводзіны і фактары, небясьпечныя або патэнцыйна небясьпечныя для навакольнага асяродзьдзя, але ёсьць сярод іх і адназначна пазытыўныя рэчы.

1. Будаўніцтва штучных выспаў. Экспэрты папярэджваюць, што яно наносіць шкоду разьвіцьцю узьбярэжжаў, экалёгіі і рыбалоўстве, правакуе адміраньне каралаў. Таксама гэта прэцэдэнт для стварэньня новых участкаў сушы, якія стануць дапамогай для тэрытарыяльных прэтэнзій у спрэчных або міжнародных водах.

2. Штучны звышінтэлект. Складальнікі сьпісу перасьцерагаюць, што яго разьвіцьцё «можа аказаць істотны, на дадзены момант непрадказальны эфэкт» на біяразнастайнасьць і захаваньне навакольнага асяродзьдзя.

3. Лоўля рыбы тралам з ужываньнем электрычных разрадаў. Прыхільнікі мэтаду настойваюць на яго эфэктыўнасьці, але ў ЭЗ ён на дадзены момант забаронены. Экспэрты паказваюць, што пабочныя і доўгатэрміновыя наступствы гэтага мэтаду пакуль ня вывучаныя.

4. «Сынтэтычныя рогі насарога». 3D-друкаркі даюць магчымасьць ствараць штучныя органы жывёл і тым самым выратаваць гэтых жывёл ад драпежніцкага вынішчэньня ў прыродзе. Абмяркоўваецца ідэя вытворчасьці сынтэтычных рагоў насарога, хоць многія эколягі лічаць, што гэтая практыка будзе толькі падсілкоўваць непажаданы попыт.

5. Наначасьцінкі, якія ўтрымліваюцца ў таварах штодзённага спажываньня і сельгаспрадукцыі, могуць трапляць у навакольнае асяродзьдзе. Некаторыя з іх, напрыклад наначасьцінкі срэбра, могуць быць вельмі таксычнымі нават у нізкай канцэнтрацыі.

6. Асматычныя (г. зн. заснаваныя на прынцыпе дыфузіі вадкасьцяў — РС) электрастанцыі. Экспэрты перасьцерагаюць, што іх адходы могуць правакаваць перапады салёнасьці вады, небясьпечныя для падводнага сьвету, а будаўніцтва электрастанцый не праходзіць бясьсьледна для навакольнага асяродзьдзя.

7. Штучныя ледавікі. Яны ўжо створаны ў Заходніх Гімалаях, каб павялічыць запасы вады для арашэньня. Але іх будаўніцтва можа адбіцца на экасыстэмах халодных пустэльняў.

8. Тэстастэрон ў вадзе. Усё больш мужчын прымаюць прэпараты з тэстастэрону, каб нарасьціць цягліцы. Магчыма, таму расьце ўтрыманьне тэстастэрону ў марской і рачной вадзе.

9. Выкарыстаньне пчол для распаўсюджваньня пэстыцыдаў і іншых рэчываў, якія абараняюць расьліны ад хвароб. Экспэрты перасьцерагаюць: наступствы гэтага для іншых насякомых і расьлін яшчэ ня вывучаныя.

10. Неабмежаванае рыбалоўства ў Арктыцы. На думку экспэртаў, яно стане магчымым ва ўмовах глябальнага пацяпленьня і пацягне за сабой рэзкае зьмяншэньне папуляцый марскіх насельнікаў.

11. Канцэпцыя «экалягічнай цывілізацыі», прынятая ўрадам Кітаю. На думку экспэртаў, у выпадку посьпеху яна акажа вялікі станоўчы эфэкт на абарону і захаваньне навакольнага асяродзьдзя ў Кітаі, а таксама натхніць іншыя краіны.

12. Сыстэмы сачэньня за караблямі. На думку экспэртаў, гэта важны шанец для ўдасканальваньня абароны навакольнага асяродзьдзя — нагляду за рыбалоўнымі судамі, барацьбы з браканьерствам, вывучэньня выкідаў з караблёў і іх уплыву на прыроднае асяродзьдзе.

13. Акустычны маніторынг, які выкарыстоўваецца для вывучэньня дзікай прыроды. Дзякуючы новым тэхналёгіям ён стаў таньней і больш эфэктыўным і дазваляе адсочваць незаконныя высечкі лесу і браканьерства.

14. Акумуляцыя энэргіі. Аўтары адзначаюць: выкарыстаньне акумулятараў можа аслабіць размах кліматычных зьменаў, але шырокае распаўсюджваньне ветраных электрастанцый і іншых тэхналёгій аднаўляльнай энэргіі можа мець непажаданыя наступствы для навакольнага асяродзьдзя.

15. Генэтыка інвазіўных біялягічных відаў. Экспэрты зьвяртаюць увагу на выпадкі, калі, насуперак звычаю, генэтычная разнастайнасьць такіх відаў багацейшая, чым у іх першапачатковым арэале.

Паводле парталу www.inopressa.ru

Ваша меркаваньне

Паказаць камэнтары

XS
SM
MD
LG