Афіша:
Вярхоўны Суд Беларусі ў касацыйным парадку праверыць законнасьць і абгрунтаванасьць прысуду, вынесенага Гарадзенскім судом Івану Куляшу, абвінавачанаму ў забойстве трох чалавек і прысуджанаму да расстрэлу. У мінулым месяцы Эўразьвяз чарговы раз заклікаў Беларусь «далучыцца да глябальнага мараторыю на сьмяротнае пакараньне ў якасьці першага кроку да яго адмены».
У менскай галерэі TUT.by (пр. Дзяржынскага, 57) беларускія пісьменьнікі прэзэнтуюць казку «Чорны чамадан». Гэтую гісторыю літаратары пісалі па чарзе, па аналёгіі з вядомай дзіцячай гульнёй. Першы ўдзельнік піша сваю частку, згортвае папяровы ліст «гармонікам» і перадае наступнаму. Той бачыць толькі апошні сказ, дапісвае, згортвае і перадае далей па крузе. Казку пісалі Альгерд Бахарэвіч, Адам Глобус, Сяргей Календа, Андрэй Хадановіч, Сяргей Дубавец і іншыя беларускія літаратары.
У гісторыі:
1348 — адбылася бітва на Стрэве паміж арміяй Тэўтонскага ордэну і злучанымі войскамі Вялікага Княства Літоўскага і Смаленскага княства.
1386 — адбыўся зьезд польскай шляхты ў Любліне, дзе вялікага князя ВКЛ Ягайлу абралі каралём Польшчы
1886 — у ЗША упершыню афіцыйна сьвяткавалі Дзень сурка
1993 — Вацлаў Гавэл стаў першым прэзыдэнтам незалежнай Чэхіі
У памяці:
1494 — нарадзілася каралева і вялікая княгіня Бона Сфорца, якая ўвайшла ў гісторыю Беларусі маштабнымі аграрнымі рэформамі.
1536 — нарадзіўся Пётар Скарга, езуіт, адметная фігура Контрарэфармацыі ў Рэчы Паспалітай, прапаведнік, першы рэктар Віленскага ўнівэрсытэту.
1838 — нарадзіўся Кастусь Каліноўскі, ідэоляг вызваленьня Беларусі, кіраўнік паўстаньня 1863-1864 гадоў.
1882 — нарадзіўся Джэймс Джойс, ірляндзкі паэт і пісьменьнік, аўтар знакамітага раману «Уліс», які на беларускую мову пераклаў наш калега Ян Максімюк.
1746 — памёр Мікалай Фаўстын Радзівіл, дзяржаўны і вайсковы дзяяч ВКЛ.
1983 — памёр Мікола Прашковіч, беларускі дысыдэнт, літаратуразнаўца, перакладчык
1996 — памёр Алесь Звонак, пісьменьнік, перакладчык, вязень сталінскіх турмаў.
Цытата:
«Геній ня робіць памылак; яго хібы сьвядомыя і служаць брамамі адкрыцьця».
Джэймс Джойс
