Лінкі ўнівэрсальнага доступу

БДІПЧ не разумее, чаму беларускія ўлады цягнуць са зьменай правілаў выбараў


Беларускім уладам зноў не хапае часу на зьмену Выбарчага кодэксу перад чарговай электаральнай кампаніяй.

Прапановы па зьмяненьні выбарчага заканадаўства і практыкі правядзеньня выбараў знаходзяцца ў беларускіх уладаў не адзін-два дні, не адзін-два тыдні і нават не адзін-два гады. Аднак увесь гэты час улады абмяжоўваюцца выключна «касмэтычнымі» праўкамі, якія не закранаюць найбольш істотныя рэчы. А калі прадстаўнікі БДІПЧ запытваюць у кіраўніцтва Цэнтральнай выбарчай камісіі, калі ж нарэшце справа дойдзе да істотных зьменаў, то ў адказ чуюць: на чарговыя выбары гэтага, мабыць, не атрымаецца — ня хопіць часу, каб правесьці папраўкі праз Нацыянальны сход.

Менавіта так выказаў свае ўражаньні ад размовы з кіраўніцтвам ЦВК дырэктар Бюро дэмакратычных інстытутаў і правоў чалавека (БДІПЧ) АБСЭ Міхаэль Георг Лінк на сустрэчы 29 студзеня зь беларускім палітыкамі і праваабаронцамі — Анатолем Лябедзькам, Міколам Статкевічам і Валянцінам Стэфановічам. У гэтай размове ўдзельнічаў і намесьнік старшыні Парлямэнцкай асамблеі АБСЭ Кент Харстэд, які, хоць і са спазьненьнем, але прыляцеў у Менск.

Анатоль Лябедзька

Анатоль Лябедзька

«Спадар Харстэд быў кіраўніком кароткатэрміновых назіральнікаў ад АБСЭ у кастрычніку 2015 году на прэзыдэнцкіх выбарах. А спадар Лінк кіруе Бюро. Абодва вельмі добра ведаюць сытуацыю ў Беларусі, і таму наша размова прайшла адкрыта і шчыра», — сказаў Свабодзе адразу пасьля заканчэньня сустрэчы старшыня Аб’яднанай грамадзянскай партыі Анатоль Лябедзька:

«Мы сказалі, што ЦВК спрабуе весьці старую гульню — весьці дыскусію па вялікім масіве паправак. А потым прыняць некалькі дробных і неістотных зьменаў.

Наш падыход абсалютна іншы. Мы прапануем факусаваць увагу не на колькасных паказьніках, а на якасных. Гэта азначае, што найперш трэба зрабіць наступныя рэчы — забясьпечыць празрысты падлік галасоў, плюралістычнае фармаваньне выбарчых камісіяў і дазволіць датэрміновае галасаваньне толькі тым выбарцам, якія зь нейкіх сур’ёзных прычынаў сапраўды ня могуць прыйсьці да скрыняў у асноўны дзень галасаваньня.

Тут у нас і спадароў Харстэда і Лінка думкі цалкам супадаюць — для істотных зьменаў патрэбная палітычная воля вышэйшага кіраўніцтва Беларусі».

Выбары ў Палату прадстаўнікоў, згодна зь дзейным заканадаўствам, найбольш верагодна пройдуць 11 верасьня 2016 году.

Паказаць камэнтары

XS
SM
MD
LG