Вярхоўная Рада прыняла закон, які прадугледжвае скарачэньне да 3 гадоў тэрміну бесьперапыннага пражываньня ва Ўкраіне для іншаземцаў і асобаў без грамадзянства, якія служаць паводле кантракту ва Ўзброеных сілах, пасьля якога яны могуць прасіць даць ім украінскае грамадзянства.
За закон аб спрошчаным парадку прыняцьця грамадзянства Ўкраіны для іншаземцаў і асобаў без грамадзянства, якія праходзяць вайсковую службу ва Ўзброеных сілах Украіны, прагаласавалі ў другім чытаньні і ў цэлым 239 дэпутатаў.
Трохгадовы тэрмін павінен вылічвацца з пачатку дзеяньня кантракту на службу ва Ўзброеных сілах. Цяпер такіх асобаў тычыцца агульны пяцігадовы тэрмін.
Акрамя таго, для такіх асобаў робіцца выключэньне з патрабаваньня атрымліваць дазвол на іміграцыю.
Вярхоўная Рада 6 кастрычніка прыняла, а прэзыдэнт Украіны Пятро Парашэнка падпісаў 3 лістапада 2015 году закон, які дазволіў замежнікам і асобам без грамадзянства служыць па кантракце ва Ўзброеных сілах Украіны, а таксама ў іншых вайсковых фармаваньнях.
Сярод замежнікаў, якія служаць ва Ўзброеных сілах Украіны, ёсьць беларусы, якія бяруць удзел у баях за цэласнасьць дзяржавы ў зоне АТА.
