Лінкі ўнівэрсальнага доступу

Пасьля правалу на перамовах у Менску пачасьціліся абстрэлы на Данбасе


Прарасейскія баевікі на Данбасе на працягу сутак 28 студзеня 71 раз абстралялі пазыцыі ўкраінскіх вайскоўцаў. Пра гэта інфармуе прэс-цэнтар штабу АТА.

Абстрэлы зафіксаваныя на Сьветладарскай дузе і ў раёне часова акупаванага Данецку.

«Напружанай была сытуацыя ў раёне Мар’інкі. Украінскія воіны вымушаныя былі адкрыць прыцэльны агонь у адказ на абстрэлы», — паведамляе штаб.

Таксама ўкраінскія вайскоўцы сьцьвярджаюць, што 28 студзеня а 21.10 баевікі з БМП і аўтаматычнага станковага гранатамёта абстралялі кантрольны пункт уезду-выезду «Мар’інка» Дзяржаўнай памежнай службы Ўкраіны.

«Паводле апэратыўнай інфармацыі, падобныя правакацыі рыхтуюцца баевікамі і на іншых кантрольных пунктах уезду-выезду, у прыватнасьці на Арцёмаўскім кірунку», — дадаюць у штабе.

У групоўцы «ДНР» украінскіх вайскоўцаў абвінавачваюць у абстрэлах прыгарадаў Данецку і Горлаўкі і падрыхтоўцы наступу.

У групоўцы «ЛНР» пра баявыя дзеяньні не паведамляюць.

Трохбаковая кантактная група ў Менску 13 студзеня заявіла пра чарговую дамоўленасьць пра спыненьне агню ў зоне баявых дзеяньняў на ўсходзе Ўкраіны з 14 студзеня. Аднак з тых часоў бакі канфлікту неаднаразова абвінавачвалі адзін аднаго ў парушэньні «рэжыму цішыні».

На апошнім паседжаньні групы, якое адбылося 27 студзеня, бакі ізноў не змаглі прадэманстраваць прагрэс у перамовах. А прадстаўнік Украіны ў працоўнай падгрупе па палітычных пытаньнях Трохбаковай кантактнай групы, былы амбасадар Украіны ў Беларусі Раман Бясьсьмертны ў інтэрвію Свабодзе заявіў, што крызіс перамоваў будзе цягнуцца да таго часу, пакуль бакі не пачнуць выконваць пункты менскіх дамоўленасьцяў, зьвязаныя зь бясьпекай.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG