Кіраўнік Беларусі Аляксандар Лукашэнка не задаволены вынікамі працы Мiнiстэрства ўнутраных спраў па выяўленьні складаных карупцыйных схемаў.
Пра гэта ён заявіў 28 студзеня на калегіі МУС.
«Вось тут я працу міліцыі ня вельмі бачу. Чаму? Таму што б’яце па дробязях, знаходзіце і караеце стрэлачнікаў. А вось бачыце вы ўсё. Наша міліцыя бачыць і ведае ўсё, што адбываецца ў грамадзтве. Але некаторыя маўчаць, некаторыя самі прыкрываюць дзялкоў, і мала таго — яшчэ і ўдзельнічаюць у гэтых схемах. Няхай пышна не квітнеюць карупцыя і злачынствы ў шэрагах МУС, але тым ня менш гэта ёсьць. Вось гэта мяне больш за ўсё насьцярожвае», — сказаў Лукашэнка.
«Канечне, вамі выяўляецца больш за 70% ад агульнай колькасьці ўлічаных карупцыйных злачынстваў. Але гэта самы нізкі ўзровень. Каардынацыя гэтай працы ў сыстэме міністэрства, выніковасьць выяўленьня складаных карупцыйных схемаў і пагадненьняў пакуль недастатковыя. Я ня памятаю буйных спраў і ў сфэры эканомікі з боку міліцыі», — цытуе БелТА Лукашэнку.
Таксама Лукашэнка папярэдзіў міліцыю пра недапушчальнасьць празьмернага кантролю прадпрымальнікаў. Ён сказаў, што «праверкі павінны весьціся толькі пры наяўнасьці апэратыўнай інфармацыі».
«Трэба памятаць адно: нікога ня трэба „ціснуць і цкаваць“. У вас павінен быць факт, хоць бы адзін, для таго каб прыйсьці і яго праверыць».
Паводле кіраўніка краіны, гэта не зьяўляецца тэндэнцыяй у міліцыі, аднак падобныя факты ёсьць.
«Бязьлітасна будзем высякаць гэта. Мы павінны быць справядлівымі. Мы цьвёрда будзем ставіцца да правапарушальнікаў. Але калі будзеце „ціснуць“ незаконна, выпрацоўваючы схемы ў пляне канкуруючых нейкіх структур, кагосьці „ціснуць“, а кагосьці падтрымліваць, літасьці ад мяне не чакайце».
Ён дадаў, што правядзе нараду і прадставіць факты выяўленых эканамічных злачынстваў, каб спыніць размовы пра забарону праверак.
Таксама Лукашэнка загадаў завяршыць аптымізацыю структуры органаў унутраных спраў у 2016 годзе:
«У нас сёньня палова начальнікаў і палова на перадавой, а трэба 80% як мінімум на перадавой, а 20% начальнікаў».
«Навошта два-тры аддзелы ў адным раёне? Два-тры гаспадары, два-тры мядзьведзі ў адным бярлогу — гэта заўсёды дрэнна. Лепш хай будзе адзін, але дамо яму ўладу».
