Лінкі ўнівэрсальнага доступу

logo-print

Старыя-новыя пратэсты: пяць пытаньняў і адказаў пра сытуацыю ў Малдове


Апошнімі днямі ў Малдове ўзмацніліся пратэсты: што ж там адбываецца і чаму за падзеямі ў Кішынёве варта сачыць?

Расказваем вельмі коратка, у пяці пытаньнях-адказах:

Малдова — гэта наогул дзе?

Рэспубліка Малдова — дзяржава на паўднёвым усходзе Эўропы, мяжуе з Украінай і Румыніяй.

Насельніцтва — каля 3.560.000 чалавек, ВУП — амаль $ 8 млрд. (з постсавецкіх рэспублік гэта дзесьці паміж Таджыкістанам і Кыргызстанам).

Што там адбываецца і чаму гэта важна?

У 2014 годзе зь дзяржбанкаў Малдовы зьнік $ 1 млрд — гэта значыць, адна восьмая частка ВУП. Для краіны гэта ня проста буйная, а гіганцкая сума. Скандал выліўся ў сур’ёзны палітычны крызіс.

Апошняму ўраду вынесьлі вотум недаверу ў кастрычніку 2015 і толькі ў студзені са скандалам прызначылі новы кабінэт.

Гэта справакавала новыя акцыі пратэсту (зь пераменным посьпехам яны цягнуцца зь мінулай вясны) — на мінулым тыдні ў Кішынёве нават спрабавалі штурмаваць парлямэнт.

Хто ў Малдове і супраць чаго пратэстуе? Зноў «празаходнія» супраць «прарасейскіх»?

Гэтага яўнага падзелу няма: выступы падтрымліваюцца як прарасейскімі, так і празаходнімі сіламі.

Жыхары Малдовы незадаволеныя карупцыяй, пагаршэньнем ў эканоміцы і засільлем алігархаў.

Жыхары Малдовы незадаволеныя карупцыяй, пагаршэньнем ў эканоміцы і засільлем алігархаў.

Пратэсты разгарэліся з новай сілай пасьля прызначэньня 20 студзеня прэм’ер-міністрам празаходняга дэмакрата Паўла Філіпа (гэта ўжо чацьвёрты прэм’ер за апошні год) — прызначэньне праходзіла выключна непразрыста, у сьпешцы на экстраннай нарадзе парлямэнту. Прысягу Філіп прымаў непублічна.

Пратэстоўцы лічаць, што новы прэм’ер — стаўленік Уладзіміра Плахатнюка, самага ўплывовага малдаўскага алігарха.

Якія ў Малдове асноўныя палітычныя сілы?

З 2009 года ў Малдове ва ўладзе знаходзіўся альянс «За эўрапейскую інтэграцыю» з трох партый: дэмакратычнай (Марыян Лупу, дэ-факта лідэр — Плахатнюк), лібэральна-дэмакратычнай (Улад Філат) і лібэральнай (Міхай Гімпу).

Пратэстоўцы паабяцалі разгарнуць кампанію грамадзянскага непадпарадкаваньня, калі іх патрабаваньні ня будуць выкананыя да 28 студзеня.


Лібэральныя дэмакраты нядаўна перайшлі ў апазыцыю — пасьля таго, як Філата затрымалі па падазрэньні ў карупцыі і датычнасьці да схем з вывадам мільярда даляраў.

Таксама па іншы бок барыкад — прарасейскія «Наша Партыя» (Рэната Усаты) і сацыялісты (Ігар Дадон), а таксама новы праэўрапейскі блок «Годнасьць і праўда» (Андрэй Нэстасе).

І што далей?

У нядзелю 24 студзеня пратэстоўцы паабяцалі разгарнуць кампанію грамадзянскага непадпарадкаваньня, калі іх патрабаваньні (правядзеньне датэрміновых выбараў у парлямэнт, адстаўка ўраду) ня будуць выкананыя да чацьвярга, 28 студзеня.

Апазыцыя пагражае блякаваньнем вуліц, дарог і ўрадавых будынкаў.

XS
SM
MD
LG