Лінкі ўнівэрсальнага доступу

З Аляксандра Алесіна зьнялі падпіску аб нявыезьдзе, справу супраць яго прыпынілі


Аляксандар Алесін

Аляксандар Алесін

КДБ прыпыніў крымінальную справу супраць ваеннага аглядальніка, журналіста Аляксандра Алесіна.

Аляксандар Алесін распавёў карэспандэнту Свабоды, што яго выклікалі ў КДБ і коратка паведамілі, што справа прыпыненая і ён цяпер вольны ў сваіх перасоўваньнях.

— Мне паведамілі аб прыпыненьні маёй справы ў адпаведнасьці з артыкулам 246 частка 1 пункт 5 Крымінальна-працэсуальнага кодэксу Рэспублікі Беларусь. Паводле артыкула, наколькі я разумею, у сувязі зь немагчымасьцю правядзеньня сьледчых дзеяньняў. Цяпер я выязны.

— Справа прыпыненая, але ня спыненая? Як вам патлумачылі?

Такое зьмякчэньне апраўдана і ў пляне паляпшэньне стасункаў зь міжнароднай супольнасьцю і выхаду на міжнародныя прававыя стандарты.

— Мне гэтага не сказалі. Наколькі я разумею, існуе пэўная юрыдычная калізія. Бо старшыня КДБ выступіў у парлямэнце з праектам пастановы пра тое, каб ліквідаваць з КПК артыкул, па якім супраць мяне была пачата справа. У парлямэнце ўсе працэдуры выкананыя, справа за подпісам прэзыдэнта. Магчыма, гэта вырашэньне гэтай калізіі. Прыпынілі, бо, з аднаго боку, працэдура прайшла ў парлямэнце, але ня вырашана канчаткова, бо прэзыдэнт не падпісаў. Але калі няма артыкула, то і справы супраць мяне няма. Такія артыкулы — гэта даволі вострая зброя. І ўсё залежыць ад намераў таго, у чыіх руках гэтая зброя. І могуць пацярпець людзі, якія не парушалі закон. Таму такое зьмякчэньне апраўдана і ў пляне паляпшэньне стасункаў зь міжнароднай супольнасьцю і выхаду на міжнародныя прававыя стандарты. Цяпер і міліцыя ідзе на зьмякчэньне розных санкцыяў у выпадку нязначных адміністрацыйных парушэньняў. То бок гуманізацыя заканадаўства апраўданая і пойдзе толькі на карысьць.

10 сьнежня 2014 году Аляксандар Алесін быў вызвалены са сьледчага ізалятара КДБ, дзе адбыў у «адзіночцы» 21 дзень. Журналіста абвінавацілі ў шпіянажы і распачалі супраць яго крымінальную справу.

Вырашаліся нейкія глябальныя задачы дзяржаўнымі і спэцорганамі, а я трапіў у гэтыя жорны.

«Я апынуўся ўцягнутым у вір. Так бы мовіць, пахмелле ад чужога вяселля. Відаць, проста трапіў пад раздачу. То бок вырашалі нейкія свае задачы, і мне не пашанцавала. Я карыстаўся выключна афіцыйнымі крыніцамі, і нават калі я атрымліваў нейкія камэнтары, гэта была інфармацыя адкрытая. Я лічу, што я не парушаў беларускага заканадаўства і ў сваёй працы не парушыў закон. Вырашаліся нейкія глябальныя задачы дзяржаўнымі і спэцорганамі, а я трапіў у гэтыя жорны».

Аляксандар Алесін кажа, што даваў падпіску аб неразгалошваньні матэрыялаў справы і цяпер, пасьля яе прыпыненьня, ня мае права падаць нейкія падрабязнасьці.

Алесін сказаў, што ягонай працы цяпер нічога не перашкаджае.

«Месяцаў пяць я ўжо больш вольна сябе адчуваў, прыкладна з таго моманту, калі пачалася працэдура па адмене гэтага артыкула. Зносіны са сьледчымі органамі былі ўсё радзей і мелі фармальны характар, а потым і наагул спыніліся. Таму я не адчуваў нейкіх абмежаваньняў у працы, апроч таго, што быў невыязны».

XS
SM
MD
LG