Лінкі ўнівэрсальнага доступу

Даніэль Таршыс пакідае пасаду старшыні Кіроўнай рады ЭГУ


Даніэль Таршыс

Даніэль Таршыс

Ён атрымаў афіцыйнае даручэньне ўраду Швэцыі ачоліць працоўную групу па пытаньнях міграцыі.

Пасьля трох гадоў на чале Кіроўнай рады ЭГУ прафэсар Даніэль Таршыс пакідае пасаду.

21–22 студзеня ў Вільні прайшло паседжаньне Кіроўнай рады ЭГУ, на якім было абвешчана, што 22 студзеня 2016 году ўрад Швэцыі прызначыў прафэсара Даніэля Таршыса кіраўніком працоўнай групы па пытаньнях міграцыі, у прыватнасьці па пытаньнях супрацоўніцтва паміж амбасадамі і кансулятамі Швэцыі і Швэдзкім агенцтвам па міграцыі. З гэтай прычыны прафэсар Таршыс вымушаны пакінуць пасады старшыні і сябра Кіроўнай рады ЭГУ.

Кіроўная рада ўнівэрсытэту выказала падзяку прафэсару Таршысу, які год быў намесьнікам старшыні, а цягам апошніх трох гадоў — старшынём Кіроўнай рады ЭГУ. Прызнаючы заслугі прафэсара Таршыса, рэктар ЭГУ прафэсар Дэвід Полік сказаў:

Дэвід Полік

Дэвід Полік

«Даніэль Таршыс знаходзіўся ў ЭГУ ў адзін з найбольш напружаных пэрыядаў існаваньня ўнівэрсытэта, у якім адбываліся складаныя зьмены і трансфармацыі. Уся супольнасьць ЭГУ шчыра дзякуе прафэсару Таршысу за ягоную падтрымку ў той момант, калі яна найбольш была патрэбная».

Разьвітваючыся з ЭГУ, былы Генэральны сакратар Рады Эўропы і прафэсар-эмэрыт палітычных навук і публічнага адміністраваньня Стакгольмскага ўнівэрсытэту Даніэль Таршыс адзначыў:

«ЭГУ застаецца выбітным праектам, які мае тры ідэнтычнасьці: беларускую, літоўскую і эўрапейскую. Я ўпэўнены, што ўнівэрсытэт працягне ўласнае існаваньне ў выглядзе энэргічнай акадэмічнай супольнасьці, якая робіць уласны ўнёсак у адукацыю моладзі і такім чынам — у будучыню Беларусі. Я хачу падзякаваць усім тым, хто дапамагаў у працэсе станаўленьня і росквіту ЭГУ».

Часовай выканаўцай абавязкаў старшыні Кіроўнай рады ЭГУ прызначана Эн Лонсдэйл, шматгадовы сябра рады. Выбары сталага старшыні прызначаныя на чэрвень 2016 году.

Эн Лонсдэйл, камандор ордэна Брытанскай Імпэрыі, — выбітны брытанскі сіноляг, экспэрт у галіне вышэйшай адукацыі і шматгадовы сябра Кіроўнай рады ЭГУ.

Эн Лонсдэйл займала пасаду прэзыдэнта Нью-Хола ў Кембрыджскім унівэрсытэце ў 1996–2008 гг., пра-віцэ-канцлера Кембрыджскага ўнівэрсытэту ў 1998–2003 гг. і намесьніка віцэ-канцлера да 2008 г. Раней сп-ня Лонсдэйл займала пасаду генэральнага сакратара Цэнтральна-Эўрапейскага ўнівэрсытэту і была адной са стваральнікаў Унівэрсытэту Назарбаева ў Астане (Казахстан), дзе была Провастам-заснавальнікам у 2010–2012 гг. і вярнулася на гэтую пасаду ў 2015 годзе.

XS
SM
MD
LG