Афіша:
У Нацыянальнай школе прыгажосьці ў Менску (вул. Мельнікайтэ, 4) пройдзе вэгетарыянскі фэстываль, галоўная мэта якога — папулярызацыя здаровага ладу жыцьця. Пачатак а 11.00.
У Палацы спорту ў Менску праводзіцца фінал чэмпіянату Эўропы па індархакеі сярод жаночых камандаў.
У Зоне Свабоды — штотыднёвай аналітычнай перадачы на тэлеканале Белсат — будуць абмяркоўвацца: падзеньне курсу рубля, абвал нафтавых цэнаў, рост беспрацоўя, страйк і пратэсты прадпрымальнікаў. У перадачы ўдзельнічаюць Валер Карбалевіч і Сяргей Навумчык ды аглядальнік расейскай службы нашага радыё Андрэй Шары. Вядучы Аляксандар Лукашук. Глядзіце перадачу а 20:20. Таксама ў суботу ў эфіры Свабоды — радыёвэрсія перадачы.
У гісторыі:
1783 — нарадзіўся Стэндаль, францускі пісьменьнік.
1793 — адбыўся другі падзел Рэчы Паспалітай.
1832 — нарадзіўся Эдуар Манэ, францускі мастак-імпрэсіяніст.
1905 — нарадзіўся Канстанты Ільдэфонс Галчынскі, польскі паэт.
1916 — Янка Купала ажаніўся з Уладзіславай Станкевіч.
1974 — заснаваны Пастаўскі краязнаўчы музэй.
1997 — утвораная Адміністрацыя прэзыдэнта Беларусі.
У памяці:
1889 — памёр Ігнат Дамейка, беларускі навуковец-дасьледчык, геоляг, нацыянальны герой Чылі.
1938 — памёр Вацлаў Ластоўскі, беларускі пісьменьнік, гісторык, літаратуразнавец, публіцыст і палітычны дзеяч.
1981 — памерла Вера Маслоўская, беларускі грамадзка-палітычны і культурны дзеяч, адна з пачынальніц беларускага школьніцтва на Беласточчыне.
1989 — памёр Сальвадор Далі, гішпанскі мастак.
Цытата:
«Тут, дзе ў нябёсах цэлы
хор расьпяяных зорак,
домік з чырвонай цэглы
абжывае пагорак —
наш схоў, Лесьнічоўка Пране,
у верасьнёвым убраньні.
Хмель на рогах аленіх
ледзь трымаецца, сыпкі;
шыбы ў лісьцях асеньніх,
восень ва ўсхліпах скрыпкі —
ледзьве кранеш скрыпку тую,
жаліцца й лямантуе.
За вокнамі лес і поле,
хвоям музыка сьніцца.
Ноч прыходзіць паволі,
і на стале — газьніца
шуміць, сьвятло гаваркое:
кажуць, Шапэн меў такое».
Канстанты Ільдэфонс Галчынскі (пераклад Андрэя Хадановіча)