Лінкі ўнівэрсальнага доступу

Naka выдала альбом «Мая малітва» па-беларуску, але ня цалкам


Гурт Naka

Гурт Naka

У новым альбоме гурту — пераважна беларускамоўныя песьні, адна на трох мовах адначасова. Беларускамоўныя песьні гурт будзе выконваць і ў Расеі, але ня ўсе.

Менскі гурт Naka 19 студзеня выдаў альбом «Мая малітва», у які ўвайшлі як раней вядомыя, так і новыя песьні, у тым ліку скандальная «Малітва», вядомая па выканьні «Песьняроў» і судзе з кампазытарам Алегам Моўчанам. Альбом можна бясплатна праслухаць на Soundcloud.

На жаль, гэтая опцыя пакуль што недаступная

Як распавяла Свабодзе вакалістка Naka Наста Шпакоўская, менавіта новая вэрсія «Малітвы», ужо не на «песьняроўскую», а на ўласную музыку, стала нагодай сабраць беларускамоўныя песьні гурту, якія сьпявае пераважна па-расейску, у адзін альбом:

«Ужо была назапашаная даволі вялікая колькасьць беларускамоўнага матэрыялу, і ўсё чакала нейкага імпульсу, каб выпусьціць альбом. І гэты імпульс быў атрыманы ў асобе Алега Ўладзімеравіча Моўчана, калі была гэтая гісторыя зь песьняй „Малітва“. Альбом сабраўся празь не такую прыемную падзею, але ў той жа час мы зразумелі, што гатовыя зрабіць цалкам беларускамоўную кружэлку».

За ранейшае выкананьне Шпакоўскай давялося заплаціць штраф 9 млн, бо яна парушыла аўтарскія правы Моўчана, выканаўшы аднойчы ягоную песьню ў сваёй аранжыроўцы. Новую ж вэрсію яна выконвае сьмела.

Поруч з «Маёй малітвай» у альбоме яшчэ 9 песень, 8 зь іх — цалкам па-беларуску. А яшчэ адна, «Про любов», — адразу па-беларуску, па-расейску і па-ўкраінску. Яе разам выканалі Наста Шпакоўская, Ганна Хітрык з гурту «Sounduk» і Сьвятлана Бень зь «Серебряной свадьбы».

«Песьня пра тое, што мы жывем у час, калі побач вайна, калі ў кожным з нас ёсьць вайна, — тлумачыць Шпакоўская. — І калі ў кожнага з нас ёсьць сваё стаўленьне да вайны. Я маю на ўвазе сытуацыю ва Ўкраіне і ў Расеі. Людзі масава, пагалоўна пачынаюць быць агрэсіўна настроеныя адзін супраць аднаго. І забываюць самае галоўнае ў гэтай барацьбе: што самае галоўнае — гэта любоў. Калі мы ня будзем адчуваць любові адзін да аднаго, будзе бяда, будзе вайна. Нездарма яна менавіта на гэтых трох мовах. Але нават калі ня браць сытуацыю блізкую, то ёсьць агульная сусьветная тэндэнцыя — тэракты, вайна ў Сырыі... Калі людзі прыгадаюць, што мае быць у іх сэрцы, гэтага ўсяго можа ня быць, людзі могуць дамаўляцца не цаной сваіх жыцьцяў, а сэрцам, мозгам».

Раней Naka шмат сьпявалі па-расейску, былі вядомыя расейскаму слухачу. Пры нагодзе яны будуць выконваць у Расеі і свае беларускамоўныя песьні, хоць і ня ўсе, нават ня ўсе расейскамоўныя:

«Новыя песьні ў любым разе ўваходзяць у новую праграму, бязь іх гурт не гучыць так, як гучыць на сёньня. Я разумею, што ёсьць у рэпэртуары гурту песьні, якія мы, хутчэй за ўсё, ня будзем выконваць не праз мову... Ёсьць песьня „Прощай“, прысьвечаная падзеям на Майдане. І каб канфліктную сытуацыю не падрываць яшчэ болей, ня станем песьні такой тэматыкі выконваць у Расеі. Але яшчэ раз скажу, што я не прыхільнік ваенных вырашэньняў любых канфліктаў, у мяне няма боязі за сябе пэрсанальна, толькі боязь распальваньня яшчэ нейкай нянавісьці».

У падтрымку альбому гурт плянуе першы за доўгі час сольны канцэрт у Менску, а таксама рыхтуе яшчэ адзін кліп:

«Цяпер у нас падрыхтоўчы пэрыяд да здымак кліпу на песьню „Трывай“. У нізкім бюджэце паспрабуем вырашыць вельмі цікавую задумку. Пакуль ня буду нічога анансаваць, бо хочацца, каб усё атрымалася ў тым выглядзе, як задумалі. Але скажу, што будзем рады бачыць нашых прыхільнікаў і новых слухачоў на прэзэнтацыі альбому 8 сакавіка ў клюбе Re:Public. Будзе вялікі-вялікі канцэрт, шмат новых песень, якіх няма нават на гэтай кружэлцы. Гурт даўно не даваў у Менску вялікіх сольных канцэртаў поўным складам, таму, спадзяюся, цікава складзецца».

Акрамя таго, у дзень рэлізу альбома Naka прадставіла кліп на песьню «Мядзьведзіца», выкананую супольна з гуртом ili-ili, якая не ўвайшла ў альбом «Мая малітва»:

XS
SM
MD
LG