Афіша:
У храм Аляксандра Неўскага (на Вайсковых могілках) прыбудзе з грэцкай выспы Корфу каўчэг з мошчамі апостала Андрэя Першазванага, Хрыстовага вучня. Пачатак сустрэчы а 08.45. Пакланіцца мошчам змогуць усе жадаючыя.
На тэрыторыі прыходу Іверскай іконы Божай Маці ў Гомелі (вул. Быхаўская, 115) ад 10.00 да 12.00 адбудзецца Калядны дабрачынны кірмаш. На кірмашы можна будзе набыць вырабы ручной працы. Сабраныя сродкі пойдуць на куплю падарункаў для дзяцей з абмежаванымі магчымасьцямі.
У Сьвята-Духавым катэдральным саборы ў Менску ад 16.00 да 20.00 адслужаць Калядную вячэрню, на якую запрошана кіраўніцтва Беларусі і сталіцы.
У гісторыі:
1911 — нарадзіўся Ўладзімір Дудзіцкі, беларускі паэт, дзеяч беларускай эміграцыі.
1919 — Менск абвешчаны сталіцаю БССР.
1924 — нарадзіўся Алесь Савіцкі, беларускі пісьменьнік.
1936 — нарадзіўся Генадзь Каханоўскі, беларускі гісторык.
1954 — у Беларусі былі ліквідаваныя вобласьці: Бабруйская, Баранавіцкая, Палеская з цэнтрам у Мазыры, Пінская і Полацкая.
У памяці:
1896 — памёр Поль Вэрлен, францускі паэт-сымбаліст.
1980 — памёр Канстанцін Кіслы, беларускі музыка, кампазытар, дырыжор царкоўных і сьвецкіх хораў.
1997 — памерла Аляксандра Саковіч, беларуская эміграцыйная пісьменьніца.
Цытата:
Як раньш, пяе
І ў сэрца б’е
Сумны тон.
То, восень, іх
Бальных тваіх
Скрыпак, стогн.
Чу! Часу ўдар!
Бляднее твар,
Рвецца ўздых:
Ўстаў карагод
Мінулых год,
Дзён былых.
А віхр ліхі,
Што ў лісьць сухі,
Дзьме ў мяне.
Нясе туды,
Нясе сюды,
Ў даль імкне.
Поль Вэрлен, «Асеньня песьня» (пераклад Максіма Багдановіча).
