Кошт нафты маркі Brent на біржы вагаўся вакол адзнакі ў 33,4 даляра за барэль. Падчас гандлёвай сэсіі яе кошт апускаўся да 33,2 даляра за барэль.
За суткі Brent патаньнела прыкладна на 8 працэнтаў на фоне абвалу на кітайскім фондавым рынку.
У чацьвер пасьля падзеньня каціровак на 5 працэнтаў уладам Кітая давялося прыпыніць працу ключавых фінансавых рынкаў краіны на 15 хвілінаў. Пасьля аднаўленьня працы біржаў падзеньне працягнулася, і ўладам давялося прыпыніць таргі ўжо да канца дня.
Усьлед за кітайскім фондавым рынкам адбываецца абвал на сусьветных фінансавых пляцоўках. У сераду зьніжэньне паказалі амэрыканскія і эўрапейскія фондавыя індэксы. На фоне падзеньня цаны на нафту патаньнеў і расейскі рубель: на таргах 6 студзеня курс даляра перавысіў 75 рублёў.
