Афіша
Горадня. Лятучы ўнівэрсытэт, грамадзкая культурніцкая кампанія «Будзьма беларусамі!», курсы беларускай мовы «Мова Нанова» прадстаўляюць цыкл лекцый, прысьвечаных Ігнату Абдзіраловічу. Першую лекцыю прачытае Павал Баркоўскі. Гелерэя «Крыга» (Савецкая, 3-11), пачатак 18.30.
Масква. Прэсавая канфэрэнцыя прэзыдэнта Расейскай Фэдэрацыі Ўладзімера Пуціна.
У гісторыі
1903 — браты Райт зьдзейсьнілі першы ў гісторыі палёт на маторным самалёце.
1924 — утворанае прафэсійнае аб’яднаньне беларускіх кінэматаграфістаў і фатографаў «Белдзяржкіно». 17 сьнежня — Дзень беларускага кіно.
1926 — у СССР адбыўся першы ўсесаюзны перапіс насельніцтва. Насельніцтва БССР у той час складала 4 985 000 чалавек.
1933 — у СССР уведзеная крымінальная адказнасьць за гомасэксуалізм.
1988 — у Беластоку адбыўся І зьезд Беларускага аб’яднаньня студэнтаў (БАС). БАС — беларуская грамадзкая арганізацыя студэнтаў у Польшчы, якая займаецца грамадзка-культурнай, асьветнай, выдавецкай, турыстычнай дзейнасьцю. БАС узьнік у 1981 годзе, але тады польскія камуністычныя ўлады адмовілі ў рэгістрацыі арганізацыі. Тагачасным лідэрам БАСу быў Ян Максімюк, студэнт Варшаўскага ўнівэрсытэту. Паўторны заснавальніцкі сход БАСу адбыўся 14 красавіка 1988 году ў Варшаве. На зьезьдзе ў Беластоку старшынём адноўленага БАСу стаў Яўген Вапа.
1998 — ЗША і Вялікабрытанія пачалі ваенную апэрацыю супраць Іраку.
У гэты дзень нарадзіліся:
1883 — Яўген Барычэўскі, беларускі літаратуразнаўца і перакладчык.
1889 — Данiла Васiлеўскi, беларускі краязнаўца, гісторык, літаратуразнаўца, пэдагог.
1905 — Іосіф Хейфэц, савецкі кінарэжысэр беларускага паходжаньня.
1936 — Францыск, папа рымскі з сакавіка 2013 году.
У гэты дзень памерлі:
1630 — Мялецій Сматрыцкі, беларускі і ўкраінскі пісьменьнік і рэлігійны дзяяч, біскуп. Выступаў супраць Берасьцейскай вуніі 1596 году. У 1610 годзе выдаў кнігу «Трэнас», у якой заклікаў беларускі і ўкраінскі народы да аб’яднаньня супраць каталіцкай экспансіі. Ягоным найбольш вядомым творам лічыцца «Граматыкі славенскія правільна сінтагма», у якой упершыню на высокім навуковым узроўні тлумачыліся артаграфія, этымалёгія і сынтаксіс стараславянскай мовы. Больш як два стагодзьдзі яна была адным з найбольш аўтарытэтных падручнікаў славянскага мовазнаўства. У 1627 годзе Сматрыцкі перагледзеў свае погляды і перайшоў у Вунію.
2006 — Іван Навуменка, беларускі пісьменьнік.
Цытата
Кіно — сон з адплюшчанымі вачыма. Сон — пэрсаніфікаваны міт. Беларускі кінэматограф — гэта проста міт, сон з заплюшчанымі вачыма ў залі для праекцый чужых малюнкаў.
Андрэй Кудзіненка